नेपालमे कोरोनासे मृत्यु हुइनाके संख्या १० हजार नाघल

काठमाडौं, २२ सावन । नेपालमे कोरोनो मृत्यु हुइनाके संख्या १० हजार नाघल बा । शुकके थप २५ कोरोना संक्रमितके मृत्यु हुइलसँगे नेपालमे कोरोनासे मृत्यु हुइनाके संख्या १० हजार १९ पुगल हो ।

बिटल २४ घण्टामे नेपालमे २ हजार ४३० जहनमे कोरोना भाइरस संक्रमण डेखाइल बा । यीसँगे नेपालमे कोरोना संक्रमण हुइनाके संख्या ७ लाख १० हजार ५०९ पुगल बा ।

ओस्टेक ठिक हुइनाके संख्या ६ लाख ६५ हजार ५४८ पुगल बा । सक्रिय संक्रमितके संख्या ३४ हजार ९४२ रहल बा । हालसम ७ लाख १० हजार ५०९ मे कोरोना संक्रमण पुष्टि हुसेकल बा ।

चीनके वुहानसे सुरु हुइल कोभिड–१९ के संक्रमण नेपालमे पहिलचो २०७६ माघ १० (जनवरी २४) मे पुष्टि हुइल रहे । कोरोनासे पहिलचो २०७७ जेठ ३ मे सिन्धुपाल्चोक बाह्रबिसेके २९ वर्षिया सुत्केरीके धुलिखेल अस्पतालमे मृत्यु हुइल रहे । कोरोनासे एक्के दिन सबसे धेर जेठ ५ गते २ सय ४६ जहनके मृत्यु हुइल रहे ।