सर्वाङ्गिण अपांगता विकास समाज नेपालके अध्यक्षमे भण्डारी

पहुरा समाचारदाता
धनगढी,२३ सावन । सर्वाङ्गिण अपांगता विकास समाज नेपाल धनगढी कैलालीके अध्यक्षमे कृष्ण प्रसाद भण्डारी निर्वाचित हुइल बटै ।

शनिच्चरके रोज धनगढीमे हुइल समाजके सातौ साधारण सभा तथा टिसरा अधिवेशनसे भण्डारीके अध्यक्षतामे ११ सदस्यीय लौवा कार्यसमिती चयन करल हो । समितिके उपाध्उयक्षमे फिरिया चौधरी, महासचिवमे उमा भण्डारी, सचिवमे मानबहादुर बस्नेत, कोषाध्यक्षमे ईन्द्रबहादुर पाली चयन हुइल बटै । ओस्टेक सदस्यमे कृष्ण कला कडायत, अन्जु चौधरी, उमा पोखरेल, हरि कुमाल, अशोक राना ओ गंगा चौधरी चयन हुइल बटै ।

यीआघे सर्वाङ्गिण अपांगता विकास समाज नेपाल धनगढी कैलालीके सातौं साधारण सभा तथा टिसरा अधिवेशनके उदघाटनसत्रके वडका पहुना धनगढी उपमहानगरपालिका वडा नम्बर ८ के अध्यक्ष नारायण बराल रहल रहिट । उदघाटन कार्यक्रममे बोल्टी उहाँ अपाङता रहल व्यक्ति सपाङ व्यक्ति जस्टे काम करके डेखाइल बटैलै । अपाङता रहल व्यक्ति हरेक क्षेत्रसे बन्चित हुइटी गैल ओरसे वडा कार्यालयसे हुई सेक्ना सहयोग कैना प्रतिवद्धता जनैलै ।

सर्वाङ्गिण अपांगता विकास समाज नेपाल धनगढी कैलालीके जग्गा भवनके लाग ९९ प्रतिशत जग्गा डेहुवइना सहयोग कैनाफे प्रतिवद्धता जनैले बटै । कार्यक्रममे अपांगता अभियानकर्मी भीमबहादुर शाह तीन तहके सरकार बनलपाछे अपाङता रहल व्यक्ति झन हकअधिकारसे बन्चित हुइल बटैलै । उहाँ कहलै, पहिले अपाङता रहल व्यक्तिहुकनके लाग अलगे बजेट छुटया जाए, अब्बे डल्लो बजेट रहठ अपाङता रहल व्यक्तिहुकनके नाउँमे आइल बजेट ग्राभेल, डगरघाट मर्मतमे खर्च कैजाइठ, अपाङता रहल व्यक्ति झन ओझेल परटी गैल बटै ।

‘अपाङता रहल व्यक्तिहुकन दुसरा दर्जाके नागरिकके रुपमे हेरजाइठ,’ अपांगता अभियानकर्मी शाह कहलै, ‘अपाङता रहल व्यक्तिहुकनके नाउँमे आइल बजेट मुलढोका नइहुके पाछेक ढोकासे निकरजाइठ ।’ और प्रदेशमे अपाङता स्याहार ग्राम स्थापना हुइना हुइलेसेफे सुदूरपश्चिम प्रदेशमे यकर सुरसारफे हुई नइसेकल उहाँ बटैलै । सुदूरपश्चिम प्रदेश सामाजिक विकास मन्त्रालयमे अपाङता रहल व्यक्तिहुकनके नाँउमे बजेट विनियोजनफे नइकरल उहाँक बटैलै ।

धनगढी उपमहानगरपालिकाके सामुदायिक विकास अधिकृत टंकबहादुर विष्ट नगरपालिकासे अपाङता रहल व्यक्तिहुकन सहयोगमे पाछे नइपर्ना बटैलै । उहाँ कहलै, अपाङता रहल व्यक्तिहुकन राज्यसे पैना सेवा सुविधासे बन्चित नइकरलेसे ओइने सपाङ व्यक्तिनसे मजा काम करके डेखाई सेक्ना बटैलै । पत्रकार प्रेम चौधरी महामारी तथा विपतके बेला अपाङता रहल व्यक्ति सबसे ढेर मारमे परल जनैलै ।

कार्यक्रममे सर्वाङ्गिण अपांगता विकास समाज नेपाल धनगढी कैलालीके कार्यकारी निर्देशक नन्दराज भट्ट संस्थाके करल गतिविधिबारे ओ अइना दिनमे कैना योजनाबारे जानकारी डेहल रहिट । सुदूरपश्चिम ओ कर्णाली प्रदेशके ६ जिल्लामे १० ठो समुह बनाके गतिविधि आघे बढाइल संस्थाके कार्यकारी निर्देशक नन्दराज बटैलै ।

संस्थासे कोभिड महामारीके जोखिममे रहल अपाङता हुइल व्यक्तिहुकन राहत वितरण, अपाङता हुइल व्यक्तिहुकन सहायक सामग्री, समावेशी शिक्षा, विद्यालयमे सचेतना कार्यक्रम संकेटिक क्यालेण्डर, निर्वाचन शिक्षा लगायत टमान गतिविधि संचालन करल बटैलै । ओस्टेक अइना दिनमे अपाङता रहल व्यक्तिके डिजिटल प्रोफाइल, सामुहिक व्यवसाय, अडियो लाइव्रेरीके साथे मिडिया मोविलाइजेशनमे प्राथमिकता डेना बटैलै । कार्यक्रममे स्वागत मन्तव्य संस्थाके सहसचिव इन्द्रबहादुर पाली करले रहिट ।

पत्रकार पहुराकर्मी सहित तीन सम्मानित

उहीसे आघे सर्वाङ्गिण अपांगता विकास समाज नेपाल धनगढी कैलालीके सातौ साधारण सभा तथा टिसरा अधिवेशनके उदघाटन सत्रमे अपांगता नागरिकहुकनके हकअधिकार, आवाज मुखरित करल यी दैनिकके सम्पादक प्रेम चौधरी, धनगढी उपमहानगरपालिकाके सामुदायिक विकास अधिकृत टंकबहादुर विष्ट ओ अपांगता अभियानकर्मी भीमबहादुर शाह सम्मानित हुइल बटै ।