सेती प्रयोगशालामे २५ जनहनमे कोरोना पुष्टि
धनगढी, २५ सावन । सोम्मारके सेती प्रादेशिक अस्पतालके प्रयोगशालामे २५ जनहनमे कोरोना पुष्टि हुइल बा । उक्त प्रयोगशालामे १६७ नमूनाके परीक्षण करेबर २५ जनहनमे संक्रमण पुष्टि हुइल अस्पतालके सूचना अधिकारी दिलिपकुमार श्रेष्ठ जानकारी डेलै ।
ओस्टके १४२ जनहनके रिपोर्ट निगेटिभ आइल बा । पाछेक २४ घण्टामे अस्पतालमे ३ जाने अस्पतालमे भर्ना हुइल बाटै । कलेसे, ३ जाने डिस्चार्ज हुइल बाटै । हाल अस्पतालमे २२ जाने संक्रमित उपचाररत रहल बाटै ।
अस्पतालमे २ जाने भेन्टिलेटर, ४ जनहनके आसीयुमे उपचार हुइटी रहल बा कलेसे ६ जनहनके अक्सिजनके सर्पोटरमे उपचार हुइटी रहल बा । ओस्टके १२ जनहनके अवस्था भर सामान्य रहल अस्पताल जनैले बा ।
ओस्टके पाछेक २४ घण्टामे एक जाने कोरोना संक्रमितके मृत्यु हुइल बा । मृत्यु हुउइयामे कैलालीके जोशीपुर गाँउपालिका २ के २८ बर्षीय पुरुष रहल अस्पताल जनैले बा ।
