वडाध्यक्षसहित २ जाने हतियारसहित पक्राउ
पहुरा समाचारदाता
धनगढी, २६ साउन । कैलारी गाउँपालिका–९ के वडाध्यक्ष खेमराज चौधरीसहित दुई जाने हतियारसहित पक्राउ परल बाटै ।
इलाका प्रहरी कार्यालय मसुरियासे खटल प्रहरी गस्ती टोली गौरीगंगा नगरपालिका–९, शंकरपुरस्थित पूर्वपश्चिम राजमार्गमे पश्चिमसे पुरुबओर जैटी रहल अवस्थामे सोम्मारके रात पक्राउ करल हो ।
५३ वर्षीय वडाध्यक्ष चौधरीसंगे पक्राउ परुइयामे धनगढी उपमहानगरपालिका–२ के ४६ वर्षीय मोहितकुमार शाह रहल प्रहरी जनैले बा । जिल्ला प्रहरी कार्यालय कैलालीके प्रहरी उपरीक्षक विश्व अधिकारीके अनुसार शाहसे चलैटी रहल बा १७ च १३१२ नम्बरके जीपहे चेकजाँच कैना क्रममे जीपभिट्टर नुकाके राखल अवस्थामे बाह्रबोर १, ओकर कार्टिज १ ओ पोइन्ट टु–टु १ थान, ओकर गोली १० राउण्डसमेत फेला पारके बरामद करल हो ।
प्रारम्भिक अनुसन्धानके क्रममे १२ बोर ओ ओकर कार्टिज वडाध्यक्ष चौधरीके ओ पोइन्ट टु–टु ओ ओकर गोली शाहके रहल खुलल बावै । चौधरी ओ शाह डुनु जनहनहे पक्राउ कैके हातहतियार खरखजाना शीर्षकमे मुद्दा दर्ता कैके थप अनुसन्धान हुइटी रहल प्रहरी जनैले बा ।
