अक्के दिन ५ हजारहे कोरोना संक्रमण, ३५ के मृत्यु
काठमाण्डौं, २६ सावन । पाछेक २४ घण्टामे ४९०४ जनहनमे कोरोना भाइरस संक्रमण पुष्टि हुइल बा ।
स्वास्थ्य तथा जनसंख्या मन्त्रालयके अनुसार १९ हजार १२३ जनहनके परीक्षणमे ४९०४ जनहनमे संक्रमण पुष्टि हुइल हो । संक्रमणके कारण ३५ जनहनके मृत्यु हुइल बा ।
ओस्टके पाछेक २४ घण्टामे २ हजार ११५ जाने चोखाइल बाटै । शुकके थपलसंगे नेपालमे कोरोना संक्रमितके कुल संख्या ७ लाख २० हजार ६८० पुगल बा । इसंगे नेपालमे मृत्यु हुउइयाके संख्या १० हजार १५० पुगल बा कलेसे ६ लाख ७३ हजार १९८ जाने संक्रमणमुक्त हुइल बाटै ।
मन्त्रालयके अनुसार हाल देशभर सक्रिय संक्रमितके संख्या ३७ हजार ३३२ रहल बावै । जौन मध्ये ३३ हजार ९८५ जाने होम आइसोलेसनमे रहल बाटै कलेसे ३ हजार ३४७ जाने संस्थागत आइसोलेसनमे रहल बाटै । कोरोनाके बिरामीमध्ये ७६१ जाने आईसीयू ओ १७६ जाने भेन्टिलेटरमे उपचाररत् रहल बाटै ।
ओस्टके १० बरस टरेक १०३ बालबालिकामे कोरोना संक्रमण पुष्टि हुइल बा कलेसे ११ से २० बरस उमेर समूहके २ सय ४१ जाने कोरोना संक्रमित थपल बाटै ।
स्वास्थ्य तथा जनसंख्या मन्त्रालयके अनुसार सबसे ढिउर काठमाडौंमे ७९५, झापामे २९७, कास्कीमे २९४, ललितपुरमे २३९ जनहनमे कोरोना संक्रमण पुष्टि हुइल बा ।
ओस्टके चितवनमे १७९, मोरङमे १६४, भक्तपुरमे १५२, सुनसरीमे १३९, काभ्रेपलाञ्चोकमे १३८, ओ नवलपरासी पूर्वमे १०० जनहनमे कोरोना संक्रमण डेखल बा ।
बागलुङमे ७१, नुवाकोटमे ५७, रुपन्देहीमे ५३, दोलखामे ४८, गोरखामे ४१, मकवानपुर ओ सुर्खेतमे ३५/३५ जाने, स्याङजामे २८, कैलालीमे २४, कञ्चनपुरमे २१, तनहुमे २०, सिन्धुपाल्चोकमे १८ जनहनमे कोरोना संक्रमण पुष्टि हुइल स्वास्थ्य तथा जनसंख्या मन्त्रालय जले जनैले बा ।
