रेशम चौधरीहे रिहाइ नैकैलेसे भुमिगत आन्दोलन कैना थारु अगुवाके चेतावनी
पहुरा समाचारदाता
काठमाडौँ,२६ सावन । रेशम चौधरीहे रिहाइ नैकैलेसे भुमिगत आन्दोलन कैना थारु अगुवाहुक्रे चेतावनी डेले बाटै ।
नेता रेशम चौधरीके नाउँमे ढिउर राजनीति हुइटी रहल आरोप लगैटी थारु अगुवाहुक्रे रेशम चौधरीहे तत्काल रिहाइ नैकैलेसे भुमिगत आन्दोलन कैना चेतावनी डेहल हुइट । मंगरके काठमाण्डौंमे हुइल बृहत अन्तरक्रिया कार्यक्रममे थारु अगुवाहुक्रे टीकापुरमे हुइल आन्दोलनसे ढिउर जाने मन्त्री ओ सांसद हुइलेसे फेन थारुनके समस्या भर जहीके टही रहल उहाँहुक्रे बटैले बाटै ।
रेशम चौधरी रिहाइ अभियानमे लागल सुरेन्द्र चौधरी जसपाके महन्थ ठाकुर पक्षसे रेशम चौधरीके एजेण्डा बोकके तत्कालीन केपी ओली सरकारमे सहभागी हुइलेसे फेन कौनो उपलब्धी हुइ नैसेकल बटैलै । उहाँ रेशम चौधरीहे रिहाइ नैकैलेसे भुमिगत आन्दोलन कैना चेतावनी समेत डेलै । नागरिक आन्दोलनके अगुवा युग पाठक तत्कालीन प्रधानमन्त्री केपी ओलीसे चौधरीके रिहाइ कैना कहिके भ्रम किल फैलाइल बटैलै ।
मोर्चासे भदौ १ गतेसे सशक्त आन्दोलनमे जैना घोषणा करले बा । ओस्टके भदौ १ गतेसे माइतीघरमे प्रदर्शन कैना ओ भदौ ६–७ गते कैलालीमे विद्रोह दिवस मनैना घोषणा करले बा ।
अन्तरक्रिया कार्यक्रममे सांसद चन्द्राकान्ता चौधरी, पूर्वराजदूत विनयकान्त कर्ण, बृहत नागरिक आन्दोलन अभियन्ता रीता परियार, थरूहट थारुवान राष्ट्रिय मोर्चाके सल्लाहकार भानु राम थारु, मोर्चाके प्रवक्ता मिनराज चौधरी लगायत धारणा राखल रहिट । कार्यक्रम श्रवण चौधरीके घरगोसियाइमे हुइल रहे ।
