११ महिनाबाड विद्युत् प्राधिकरणमे लौटनैं कुलमान
काठमाडौं, २७ सावन । सरकार कुलमान घिसिङहे नेपाल विद्युत् प्राधिकरणके कार्यकारी निर्देशक नियुक्त करले बा । सोम्मार बैठल मन्त्रिपरिषद् बैठकसे घिसिङहे कार्यकारी निर्देशकमे नियुक्त करल ऊर्जा, जलस्रोत तथा सिंचाइ मन्त्रालय जनैले बा ।
घिसिङहे नियुक्त करल पत्र मंगरके रोज आपुगल ओ आज पत्र बुझके पदबहाली करना मन्त्रालय जनैले बा ।
घिसिङ कार्यकारी निर्देशकके चारवर्षे कार्यकाल पूरा करके भदौ ३१ मे प्राधिकरणसे बिदा हुइल रहैं । प्राधिकरणके कार्यकारी निर्देशक हितेन्द्र शाक्यहे जल तथा ऊर्जा आयोगमे विशिष्ट श्रेणीके सुविधासहित सरुवा करल फेन मन्त्रालय स्रोत जनैले बा ।
२०७३ भदौ २९ के मन्त्रिपरिषद् निर्णयसे प्राधिकरणके कार्यकारी निर्देशकमे नियुक्त घिसिङहे लोडसेडिङ अन्त्य करल ओ वर्षौंसे घाटामे रहल संस्थाहे नाफामे लैगिल श्रेय जाइठ ।
दैनिक १८ घण्टासम लोडसेडिङ हुइटिरहल अवस्थामे कार्यकारी निर्देशकमा नियुक्त हुइल घिसिङ अपन कार्यकालके पहिल वर्षमे उपत्यकामे लोडसेडिङ अन्त्यके व्यवस्थापन करले रहैं । २०७५ वैशाखसे देश लोडसेडिङमुक्त हुइल घोषणा करल रहे । घिसिङ नियुक्त हुइबेर प्राधिकरणके सञ्चिति घाटा करिब ३५ अर्ब रुपैयाँ रहे । घिसिङके कार्यकालके अन्तिम वर्षमे प्राधिकरणके मुनाफा करिब १२ अर्ब पुगल रहे । ओ प्राधिकरण सबसे ढेर नाफा कमैना सरकारी संस्थान बनल रहे ।
विद्युत् चुहावट नियन्त्रणमे फेन उल्लेख्य सफलता हात पारल जस घिसिङ पैले रहैं । २६ प्रतिशत विद्युत् चुहावटके अवस्थाहे घिसिङ चार वर्षमे १५ प्रतिशतमे झरले रहैं ।
