अवैध सोन सहित ३ जाने पक्राउ

पहुरा समाचारदाता
धनगढी, २७ साउन । कैलालीमे अवैध सुनसहित तीन जाने पक्राउ परल बाटै । सुदूरपश्चिम प्रदेश प्रहरी कार्यालय, अपराध अनुसन्धान समूह (आरआइटी) ओ इलाका प्रहरी कार्यालय मालाखेतीके संयुक्त टोलीसे ४४९.७७ ग्राम अवैध सुनसहित तीन जाने पक्राउ परल हुइट ।

पक्राउ परुइयामे शैलेश्वरी सुनचाँदी पसल अत्तरियाके सञ्चालक समिर सिजापती, उहे सुनचाँदी पसलमे कार्यरत सुनसरीके राजु बिक ओ कञ्चनपुरके शुक्लाफाँटा नगरपालिका वडा नम्बर ८ के भवानी घिमिरे रहल बाटै ।

उहाँहुक्रनठनसे ४९ हजार ढिउर नगद ओ ५ थान मोबाइल फेन बरामद करल जिल्ला प्रहरी कार्यालय कैलालीके प्रहरी उपरीक्षक विश्व अधिकारी जानकारी डेलै । अत्तरिया स्थित सडकखण्डमे काठमाडौंसे महेन्द्रनगर ओर जैटी रहल ना. ८ ख ८३४९ नम्बरके महाकाली यातायातके बसहे चेकजाँच करेबर अवैध सुन ओ नगद सहित पक्राउ करल उहाँ बटैलै ।

‘काठमाडौंसे महेन्द्रनगर ओर जैटी रहल ना. ८ ख ८३४९ नम्बरके महाकाली यातायातके बसहे चेकजाँच करेबर उक्त बसके कण्डक्टर घिमिरेके साथसे ४९.९५ ग्राम अवैध सुनके बाला ओ नगद २६ हजार बरामद करल रहे,’ प्रहरी उपरीक्षक अधिकारी कहलै, ‘बसमे सवार राजु बिकके साथसे सुनके बाला ओ सिक्री सहित जम्मा ३४९.८७ ग्राम अवैध सुन बरामद करल हो । ओहकानठनसे नगद ६ हजार ९ सय बरामद करल बा ।’

उहाँहुक्रनहे सोधपुछ कैना क्रममे सुन अत्तरियाके व्यवसायी समिर सिजापतीके खुलल्पाछे सिजापतीहे फेन पक्राउ करल हो । सिजापतीके खानतलासी करेबर उहाँहुक्रनठनसे ४९.९५ ग्राम अवैध सुनके बाला ओ १६ हजार तीन सय नगद बरामद हुइल प्रहरी जनैले बा ।

भवानी घिमिरे ओ समिर सिजापतीके साथमे कतार दोहाके बिल रहल मने किनुइया व्यक्तिके विवरण फरक रहल प्रहरी जनैले बा । थप अनुसन्धानके लाग राजस्व अनुसन्धान कार्यालय, कोहलपुर पठैना जिल्ला प्रहरी कार्यालय कैलाली जनैले बा ।