कञ्चनपुरमे ९ प्रतिशत लगैलै कोरोना विरुद्धके खोप

कञ्चनपुर, २७ सावन । कोरोना भाइरस संक्रमणके उच्च जोखिमके जिल्लाके रुपमे चिनथैल कञ्चनपुरमे हालसम नौ प्रतिशत नागरिक किल कोरोनाविरुद्धके खोप लगैले बाटै ।

यहाँ कोरोना विरुद्धके खोप अभियान सुरु करल सात महिना पुग्लेसे फेन स्वास्थ्यकर्मी, सुरक्षाकर्मी, एम्बुलेन्स चालक, सरसफाइकर्मीलगायत लक्षित वर्गके ४१ हजार ७१० जाने किल पूर्ण खोप लगैले बाटै ।

स्वास्थ्य कार्यालय कञ्चनपुरके खोप प्रमुख जनक कुँवर यहाँ कोभिशिल्ड, भेरोसेल ओ ‘जोन्सन एण्ड जोन्सन’ कैके तीन मेरके खोप टमान समयमे लगाइल जानकारी डेलै ।

ओहकान अनुसार ३० हजार २२४ जाने कोभिशिल्ड खोप लगाइलमे ६ हजार ७४० जाने किल पूर्ण खोप (डुनु किल) लगाइल जानकारी डेलै । ओस्टके ३९ हजार ६९५ जाने भेरोसेल खोप लगाइलमे सात हजार ५७० जाने किल खोपके डुनु मात्रा लगाइल खोप प्रमुख कुवर बटैलै ।

ओस्टके जोन्सन एण्ड जोन्सन खोप २७ हजार चार सय जाने लगाइल स्वास्थ्य कार्यालय जनैले बा । “कोभिशिल्डके डुसरा मात्रा साउनके अन्तिम साता आपुग्ना बटाइल बा ।” उहाँ कहलै, “भेरोसेलके डुसरा मात्रा भदौ डुसरा सातासे लगैना तयारी रहल बा ।”

विसं २०६८ के राष्ट्रिय जनगणना अनुसार कञ्चनपुरके कूल जनसंख्या चार लाख ५१ हजार २४८ रहल बा । उ मध्ये नौ प्रतिशतसे कोरोना भाइरसविरुद्धके खोप लगाइल बाटै । कोरोना भाइरस संक्रमणके कारण कञ्चनपुरमे हालसम १८७ जाने ज्यान गुमासेकल स्वास्थ्य कार्यालय जनैले बा ।

“हमार यहाँ खोप रख्ना क्षमता दश हजार डोज किल हो”, खोप प्रमुख कँवर कहलै, “खोप राखक लाग नयाँ कोल्ड रुम बनैना गृहकार्य हुइटी रहल बा ।”