छानबिन टोली धनगढीमे, मुख्यमन्त्री ओ कानूनमन्त्रीसे छलफल
पहुरा समाचारदाता
धनगढी, २७ सावन । दार्चुला तुइन घटना छानबिन कैना गठन हुइल टोली धनगढी पुगल बा । भारतीय एसएसबीसे तुइनके डोरी काटडेहलपाछे जयसिंह धामी लडियामे गिरके बेपत्ता हुइल घटनाके छानबिनके लाग गठित टोली धनगढी पुगल हो ।
गृह मन्त्रालयके सहसचिव जनार्दन गौतम नेतृत्वके टोलीसे बुधके सकारे प्रदेश राजधानी धनगढी पुगके सुदूरपश्चिम मुख्यमन्त्री त्रिलोचन भट्ट ओ आन्तरिक मामिला तथा कानूनमन्त्री पूर्णा जोशीसे भेटघाट करल बा । उ क्रममे छानबिन टोलीसे दार्चुलामे रहिके करल कामके बारेम समेत मुख्यमन्त्री भट्ट ओ कानूनमन्त्री जोशीहे जानकारी कराइल बा ।
मन्त्री जोशीसे गृहके टोलीसे दार्चुलामे सरोकारवाला निकाय, पीडित परिवार, प्रत्यक्षदर्शीसे भेटघाट तथा छलफल, घटनास्थलके अवलोकन करल विषयमे जानकारी कराइल बटैटी प्रतिवेदन भर काठमाडौं बुझैना बटैली ।
मन्त्री जोशी टोलीहे यहाँके सीमा सुरक्षा, भारतीय पक्षसे सीमा नाकामे डेना सास्ती लगायतके विषयमे जानकारी करैटी आगामी दिनमे अइसीन घटना दोहरे नैडेना सरकार गम्भीर बने पर्ना सुझाव समेत डेले बाटी ।
‘सिंहदरबारके आँखीसे सीमा सुरक्षा ओ शान्ति सुरक्षाके हकमे सरकारके सुदूरपश्चिमहे हेर्र्ना दृष्टिकोण कमजोर बा कना बात मै फेन रख्ले बाटुँ,’ मन्त्री जोशी कहली, ‘सशस्त्र प्रहरीके बीओपी व्यवस्थित करेपर्र्ना, दार्चुला तिंकर सडक, महाकाली करिडोर ओ महाकाली लडियामे निर्माणाधीन झोलुङ्गे पुल शीघ्र निर्माण कैके आवतजावतके लाग दार्चुलाबासी भारतीय भूमिके प्रयोग करे पर्र्ना बाध्यता अन्त्य करे पर्र्ना सुझाव डेली ।’
मंगरके दार्चुलासे घुमल टोली मुख्यमन्त्री ओ कानूनमन्त्रीहे छुट्टाछुट्टे रुपमे भेटल हो । बैतडी ओ डडेल्धुरामे महाकाली लडियाके तटीय क्षेत्रके निरीक्षण कैके घुमल टोली कञ्चनपुर फेन निरीक्षणके लाग जैना बटाइल बा ।
छानबिन टोलीके सदस्य समेत रहल सुदूरपश्चिम प्रदेशके प्रमुख प्रहरी नायब महानिरीक्षक (डीआईजी) पुरुषोत्तम कँडेल कञ्चनपुरमे फेन महाकाली लडियाके तटीय क्षेत्रके निरीक्षण कैना कार्यक्रम रहल जानकारी डेलै ।
गत १५ साउनमे भारतीय भूमिके प्रयोग कैके सदरमुकाम खलंगा आइबर महाकाली लडियामे तुइन नाघ्ना क्रममे भारतीय एसएसबी डोरी काटडेहलपाछे गिरके व्याँस गाउँपालिका–२ के जयसिंह धामी बेपत्ता हुइल रहिट ।
गृह मन्त्रालयसे घटनाके छानबिनके लाग सहसचिव गौतमके नेतृत्वमे छानबिन टोली गठन करल रहे ।
