पहुरा थारु दैनिकहे मातृभाषा पत्रकारिता पुरस्कार
पहुरा समाचारदाता
काठमाडौं, २८ सावन । नेपाल आदिवासी जनजाति पत्रकार महासंघ (फोनिज) केन्द्र आपन २२ औं स्थापना दिवसके अवसरमे आठ पत्रकार ओ दुई मातृभाषी पत्रिकाहे सम्मानित करले बा । स्थापना दिवसके अवसरमे बुधके काठमाण्डौंमे आयोजित कार्यक्रममे उ सम्मान प्रदान करल हो ।
फोनिजसे पत्रकार भवानी बराल, कुमार यात्रु तामाङ, राजकुमार दिक्पाल, रचना श्रेष्ठ, तिलक पुनमगर, इन्द्रजित मुखिया, आङदावा शेर्पा, मौसम रोकामगर सम्मानित हुइल बाटै । पुरस्कारके राशी जनही २० हजार रुपियाँ ओ सम्मानपत्र रहल बा । ओस्टके, फोनिज यूकेसे स्थापित पुरस्कारसे दुईजाने पत्रकार सन्त गाहामगर ओ टेकराज थामी सम्मानित हुइल बाटै । पुरस्कारके राशी जनही २५ हजार रुपियाँ ओ सम्मानपत्र रहल बा ।
ओस्टके, फोनिज केन्द्रसे स्थापित मातृभाषा पत्रकारिता पुरस्कार २०७८ से मातृभाषाके दुई पत्रिका सम्मानित करगिल बा । कैलालीके धनगढीसे प्रकाशित हुइटी रहल पहुरा थारु दैनिक ओ काठमाडौंसे प्रकाशित हुइटी रहल लिम्बु भाषाके तान्छोप्पा मासिक पुरस्कृत हुइल बा । पुरस्कारके राशी १० हजार ओ सम्मानपत्र रहल बा ।
राष्ट्रिय सूचना आयोगके प्रमुख आयुक्त महेन्द्रमान गुरुङ सम्मानित पत्रकारहे सम्मान हस्तान्तरण करल रहिट । उ अवसरमे प्रमुख आयुक्त गुरुङ समावेशीता ओ आदिवासी जनजाति समुदायके सशक्तिकरणके लाग फोनिजके योगदान महत्वपूर्ण रहल बटाइल रहिट ।
फोनिजके केन्द्रीय अध्यक्ष डण्ड गुरुङके अध्यक्षतमे हुइल कार्यक्रममे नेपाल पत्रकार महासंघके कार्यबाहक अध्यक्ष रमेश विष्ट, फोनिज सल्लाहकार खिम घले, अनिता गुरुङ, सम्मानित पत्रकार भवानी बराल, आङदावा शेर्पा, फोनिजके वरिष्ठ उपाध्यक्ष गजुरधन राई, उपाध्यक्ष लक्की चौधरीलगायत शुभकामना मन्तव्य व्यक्त करल रहिट ।
