भाँसु भीरमे जीप गिरके २ के मृत्यु, ३ घाहिल
धनगढी, २८ सावन । भीमदत्त राजमार्गअन्तर्गत कैलालीके चुरे गाउँपालिका–३, स्थित भाँसु भीरमे जीप गिरके २ जहनके मृत्यु हुइल बा कलेसे ३ जाने घाहिल हुइल बटैं ।
जीप गिरके चुरे–६ के ३६ वर्षिया दुर्गा साउँद ओ डोटीके जोरायल गाउँपालिका–१, के पाँच वर्षिया एलिसा खड्काके मृत्यु हुइल सुदूरपश्चिम प्रदेश ट्राफिक प्रहरी कार्यालय अत्तरिया जनैले बा ।
दुर्घटनामे गम्भीर घाहिल दुनुहुनहे उपचारके लाग अत्तरियास्थित पद्मा अस्पतालमे नाल बाद मृत्यु हुइल प्रदेश ट्राफिक प्रहरी कार्यालयके प्रवक्ता प्रहरी निरिक्षक गणेशराज उप्रेती बटैलैं । अस्टेक, जीप चालक जोरायल गाउँपालिका–१, के ३१ वर्षिय रमेश खड्का, ओहे ठाउँके २८ वर्षिया निर्मला खड्का ओ चुरे–६ के आठ वर्षिय सुशील साउँद घाहिल हुइल बटैं ।
घाहिलहुनके अत्तरियास्थित पद्मा अस्पतालमे उपचार हुइटिरहल प्रहरी जनैले बा । घाहिल साउँदके अवस्था गम्भीर रहल प्रहरी निरिक्षक उप्रेती बटैलैं ।
धनगढीसे डोटी जाइबेर प्रदेश नं. ३–०१–०२३ च ९०५९ नम्बरके जीप काल्ह (बुधके) साँझ दुर्घटना हुइल रहे । जीप सडकसे करिब ३ सय मिटर तरे गिरल प्रहरी निरिक्षक उप्रेती बटैलैं । जीप अनियन्त्रित हुके दुर्घटना हुइल बुझगिल प्रहरी जनैले बा ।
