ठप ३२६० जनहनमे कोरोना संक्रमण पुष्टि, ३२ के मृत्यु
पहुरा समाचारदाता
धनगढी, २८ सावन । पछिल्का २४ घण्टामे नेपालमे ठप ३२६० जनहनमे कोरोनाभाइरस संक्रमण पुष्टि हुइल बा । स्वास्थ्य मन्त्रालयके अनुसार उहे अवधिमे ३२ जाने ज्यान गुमैले बटै कलेसे २२९४ जाने संक्रमणमुक्त हुइल बटै ।
यी संगे देशभर कोरोना संक्रमितके कुल संख्या पीसीआर विधिसे ७ लाख २५ हजार ७६९ जाने पुगल बटै कलेसे एन्टिजेन विधिसे ७२ हजार ८८२ जाने पुगल बटै । संक्रमितमन्से ६ लाख ७७ हजार ३७७ संक्रमणमुक्त हुइल बटै कलेसे १० हजार २१२ जानेक मृत्यु हुइल बा ।
अस्टेक, धनगढीके सेती प्रादेशिक अस्पतालमे करल परीक्षणमे थप २३ जाने कोरोनाके संक्रमण पुष्टि हुइल बा ।
बिफेक रोज अस्पतालके प्रयोगशालामे ९७ जनहनके नमूना परीक्षण करलमे २३ जनहनमे संक्रमण पुष्टि हुइल अस्पतालके सूचना अधिकारी दिलिपकुमार श्रेष्ठ जानकारी डेलै ।
सूचना अधिकारी श्रेष्ठके अनुसार अस्पतालमे पाछेक २४ घण्टामे थप ३ जाने बिरामी भर्ना हुइल बाटै कलेसे चोखाक डिस्चार्ज हुउइयाके संख्या २ रहल बा । हाल अस्पतालमे २८ जाने संक्रमित उपचाररत रहल बाटै । जौनमध्ये ४ जनहनके आइसियूमे राखके उपचार हुइटी रहल बा कलेसे २ जनहनहे भेन्टिलेटरमे उपचार हुइटी रहल बा ।
