प्रदेश सञ्चार नीति मिडियामैत्रीमे जोड

पहुरा समाचारदाता
धनगढी, २८ सावन । सुदूरपश्चिम प्रदेशके प्रदेश सञ्चार नीति मिडियामैत्री हुइ पर्ना एक कार्यक्रमके सहभागीहुक्रे जोड डेले बाटै ।

नेपाल पत्रकार महासंघ केन्द्रीय कार्यालयके आयोजना तथा नेपाल पत्रकार महासंघ सुदूरपश्चिम प्रदेशके संयोजनमे बिफेक रोज धनगढीमे हुइल प्रदेश सञ्चार नीति सम्बन्धी अन्तरक्रिया कार्यक्रमके सहभागीहुक्रे प्रदेश सञ्चार नीति मिडियामैत्री हुइ पर्ना औंल्याइल रहिट ।

वरिष्ठ पत्रकार मनमोहन स्वाँर प्रदेश सञ्चार नीति मिडियामैत्री लाने पर्ना सुझाइल रहिट । ओकर साथे उहाँ प्रदेश सरकारसे लन्ना सञ्चार नीति मिडियाहे नियन्त्रण कैना मेरके नैहोके नियमन कैना मेरिक नीति बनैना आवश्यक रहल औंल्याइल रहिट ।

नेपाल पत्रकार महासंघ सुदूरपश्चिम प्रदेशके पूर्व अध्यक्ष अर्जुन शाह प्रदेश सञ्चार नीति पत्रकारहुक्रनके पेशागत ओ भौतिक सुरक्षा सम्बोधन हुइना खाल लाने पर्ना बटाइल रहिट । यकर साथे उहाँ सञ्चारकर्मी तथा मिडियाहे प्रोत्साहन ओ प्रर्वद्धन कैना मेरके नीति बनैना आवश्यक रहल बटाइल रहिट ।

नेपाल पत्रकार महासंघके केन्द्रीय सदस्य भरत शाह अनाधिकृत रुपमे सञ्चालित अनलाईन मिडिया, यूट्यूब च्यानल तथा सामाजिक सञ्जालहे नियमन कैना मेरिक सञ्चार नीति बनैना सुझाइल रहिट ।

कार्यक्रममे कांग्रेस संसदीय दलके नेता डा. रणबहादुर रावल प्रदेश सरकारसे लन्ना सञ्चार नीति पत्रकारमैत्री किल नैहोके मिडियामैत्री फेन आवश्यक हुइ पर्ना बटाइल रहिट ।

यहोर सुदूरपश्चिम प्रदेशके आन्तरिक मामिला तथा कानून मन्त्री पूर्णा जोशी प्रदेशके सञ्चार नीति असोज मसान्त भित्रे लन्ना तयारी हुइल बटाइल रही । उहाँ पत्रकारहुक्रनके हकहित तथा पेशागत सुरक्षा लगायत यहाँके मिडियाहे सम्बोधन कैना मेरिक मिडियामैत्री सञ्चार नीति लन्ना बटाइल रही ।

कार्यक्रममे नेपाल पत्रकार महासंघके केन्द्रीय उपाध्यक्ष बाला अधिकारी, नेपाल बार एशोसिएशनके केन्द्रिय महासचिव लीलामणि पौडेल, मुख्य न्यायीधिवक्ता कुलानन्द पाध्याय, राष्ट्रिय मानव अधिकार आयोगके मोहनदेव जोशी, पत्रकार दीलबहादुर छत्याल, शिवराज भट्ट, गोविन्द रोस्यारा, नेपाल पत्रकार महासंघके पूर्व केन्द्रीय सदस्य मीन बम, नेपाल प्रेस यूनियन कैलाली अध्यक्ष श्रवण देउवा, प्रेस चौतारीके भानुभक्त आचार्य लगायत धारणा राखल रहिट ।

नेपाल पत्रकार महासंघके केन्द्रीय सचिव हेमकर्ण विक स्वागत तथा कार्यक्रमके उद्देश्यबारे जानकारी करल रहिट । कार्यक्रम नेपाल पत्रकार महासंघ सुदूरपश्चिम प्रदेश अध्यक्ष योगेश रावलके अध्यक्षतामे हुइल रहे कलेसे कार्यक्रमके सञ्चालन महासचिव रामसिंह ठगुन्ना करल रहिट ।