मन्त्रिपरिषद्हे पूर्णता डेना अभिन सकस
काठमाडौं, २९ सावन । काँग्रेस महाधिवेशनके अन्योल कायमे रहल ओरसे मन्त्रिपरिषद् कभिनसम पूर्णता पाइ कनामे अभिन अनिश्चित बा ।
यीआघे सरकारके न्यूनतम साझा कार्यक्रम सार्वजनिक हुइलपाछे मन्त्रिपरिषद् पूर्णता पैना गठबन्धन दलके नेताहुक्रे बटैटि आइल रहैं । मने, साझा कार्यक्रम सार्वजनिक हुसेकलेसे फेन मन्त्रिपरिषद्हे पूर्णता पाइ सेकल नैहो ।
पछिल्काचो प्रधानमन्त्री शेरबहादुर देउवा काँग्रेस महाधिवेशनबारे टुंगो लगाइलपाछे मन्त्रिपरिषद्हे पूर्णता डेना बटैलैं । मने काल्हसे सुरु हुइल काँग्रेस बैठकसे महाधिवेशनबारे निर्णय करे सेकल नैहो । काँग्रेस महाधिवेशनके अन्योलसँगे मन्त्रालय भागबण्डा तथा उपप्रधानमन्त्री बनैना या नैबनैना कना विवादसे फेन मन्त्रिपरिषद् विस्तारमे ढिलाइ हुइल हो ।
काँग्रेस, माओवादी केन्द्र ओ जसपाके शीर्ष नेताहुक्रे उपप्रधानमन्त्रीके हैसियतमे किल सरकारमे जाइ चाहल बटैं । मने प्रधानमन्त्री देउवा ओ माओवादी केन्द्रके अध्यक्ष पुष्पकमल दाहाल ‘प्रचण्ड“ उपप्रधानमन्त्री नैढरना पक्षमे बटैं । अस्टेक गठबन्धनके दलमे मन्त्री बने खोजुइया ढेर हुइलबाद नेतृत्वहे मिलैना समस्या हुइल बा ।
काँग्रेसभित्तर वरिष्ठ नेता रामचन्द्र पौडेल तथा कृष्णप्रसाद सिटौला समूहहे कैसिक समेट्ना विषयमे समझदारी हुइ सेकल नैहो । नेकपा माओवादी केन्द्र फेन सरकारमे जैना मन्त्री टुंगो लगाइ सेकल नैहो । आधिकारिकता विषय अदालतसे टुंग्याइलपाछे जसपा मन्त्री छन्ना विषयमे केन्द्रित हुइलेसे फेन विवाद बाँकी बा ।
एमालेके माधव नेपाल समूह सरकारमे जैना या नैजैना अभिन टुंगो लागल नैहो । लम्मा समय विभागीय मन्त्री अभावमे सरकारमे कुछ काम कारबाही रुकेल बा । सचिव तहसे हुइना प्रशासनिक काम निरन्तर रहलेसे फेन मन्त्रीस्तरीय कार्य प्रभावित बने पुगल बा । एक महिनाआघे प्रधानमन्त्रीमे नियुक्त देउवाके १७ ठो मन्त्रालय सम्हरटि आइल बटैं ।
