काम करके खैना जग्गा चाहलः बादी समुदाय
पहुरा समाचारदाता
धनगढी, ३० सावन । बादी समुदायके अगुवाहुक्रे काम करके ३ सय ६५ दिन खाई पुग्ना अपनेहुकनके स्वामित्वमे रहल जग्गाके माग करले बटै ।
स–शक्तिकरणका क्षेत्रमा यूवाहरु (एस) नेपालके आयोजनामे धनगढीमे हुइल ‘वादी समुदायके सामाजिक अवस्था ओ अइना डगर अध्ययन प्रतिवेदन उप्पर सुझाव संकलन’ कार्यक्रममे उ समुदायके अगुवाहुक्रे काम करके खैना जग्गाके माग करल रहिट ।
सुदूरपश्चिम बादी उत्थान समाजके सहसचिव नन्दलाल बादी सरकार ओ बादी समुदायविच हुइल सहमतिके कार्यान्वयन करटी अपने खेतबारीमे काम करके बरसभर खाई पुग्ना जग्गा उपलब्ध करैना आग्रह करल रहिट । बादी समुदायके नाउँमे अइल बजेट बादी समुदायके व्यक्तिनसे संचालन करल संस्थाहे डेहे पर्नाफे उहाँ माग आग्रह रहे ।
बादी समुदायके अगुवा महिला रमा बादी सुदूरपश्चिम प्रदेशके तराई ओ पहाडमे बैठना बादी समुदाय अवस्था अक्के मेरिक नइरहल कहटी भौगोलिक अवस्था हेरके सेवा सुविधा उपलब्ध कराई पर्ना माग करल रहिट । ‘संघीयता आइलपाछे अब्बे तीन तहके सरकार बा,’ उहाँ कहली, स्थानीय सरकारसे सहयोग पैलेसेफे प्रदेश सरकारसे बादी समुदायके लाग एक ठो माछीफे नइमरले हो, का हम्रे प्रदेश बासी नइहुई ? स्थानीय सरकार हम्रहिन सहयोग करठ, का प्रदेशके जिम्मेबारी नइहो उहाँ कहली ।
राष्ट्रिय दलित नेतवर्कके केन्द्रीय सदस्य श्याम सुनार एक दुई कटठा जग्गा डेहे बादी समुदायके समस्या समाधान हुई नइसेक्ना बटैलै । तराईमे बासोबास कैना प्रतिघर १० कटठा जग्गाके व्यवस्था करलेसे ओइने करके खाई सेक्ना केन्दीय सदस्य सुनार बटैलै । ‘बादी समुदायके लाग आवस गृह बनाके अक्के कोठामे आठ–दश जनहन कोचगिल बा, उहीसे झन समस्या सृजना हुइल बा, उहाँ कहलै,–उहे कोठामे खाना पकाई पर्ना, सुटनाफे उहे, मनोरन्जनफे उहे कोठामे करे परल कारण बालबालिकाके लाग पह्रना वाताबरण नइबनल हो ।
बादी समुदायके बालबालिकाहुकन शिक्षामे पहुँच पुगैना हो कलेसे आवाससहितके विद्यालयके स्थापना करे पर्नामे उहाँ जोड डेलै ।
फाया नेपालके कार्यकारी निर्देशक बादी समुदायके आर्थिक सशक्तिकरणमे जोड डेहल रहिट । राष्ट्रिय मानव अधिकार सुदूरपश्चिम प्रदेश प्रमुख मोहन जोशी बादी समुदायहे समनताके आधारमे नाही समताके आधारमे सेवा सुविधा उपलब्ध कराईमे जोड डेहल रहिट । संविधान सभा सदस्य हरिश्रीपाइली बादी समुदाय ओ सरकार विच हुइल अभिनसमके सहमतिके खोजविन करके उहीहे कार्यान्वयनमे जोड डेहे पर्ना बटैलै । छुवाछुटके अन्त्य कागजमे केल सिमित रहल कहटी दलित समुदायहे हेर्ना दृष्टिकोणमे अभिन परिवर्तन नइहुइल उहाँ बटैलै ।
कार्यक्रममे प्रदेशसभा सदस्य दुर्गा विक, उमादेवी बादी, टेक बहादुर रैका, मालामति राना प्रदेशस्तरसे हुइना सहयोगमे कौनो कमी नइरख्ना प्रतिबद्धता जनैलै । सुदूरपश्चिम प्रदेशके मुख्यन्यायधिवक्ता कुलानन्द उपाध्याय बादी समुदायके आयआर्जनमे ध्यान डेहे पर्ना बटैलै ।
कार्यक्रममे अग्रज पत्रकार मनमोहन स्वाँर कैलाली जिल्लाके लम्कीचुहा नगरपालिका वडा नम्बर ३ बलचौरमे बसोबास करल १ सय ४८ घरधुरीके वादी समुदायके सामाजिक अवस्था ओ अइना डगर अध्ययन प्रतिवेदन प्रस्तुत करले रहिट । उ प्रतिवेदन बादी समुदायके २५ जाने ओ और समुदायके १६ जनहनके सोधपुछ करके तयार करल रहे । जेम्ने उ समुदायके शिक्षा, सम्पति ओ सम्मानमे जोर डेहल रहे ।
कार्यक्रम एस नेपालके अध्यक्ष बालमिकी आउजीके अध्यक्षतामे हुइल रहे । कलेसे संचालन नित्यनन्द जोशी ओ स्वागत मन्तव्य एस नेपालके कार्यकारी प्रमुख दिपिका बोहरा करले रहिट ।
