सामाजिक रुपान्तरणफे विकासके महत्वपूर्ण पाटोः उपप्रमुख मिश्रभट्ट

तीन दिने नेतृत्व लैङिकता ओ स्थानीय स्तरमे सहभागिता विषयक अभिकरण कार्यक्रम
पहुरा समाचारदाता
धनगढी,३० सावन । धनगढी उपमहानगरपालिकाके नगर उपप्रमुख सुशिला मिश्रभट्ट सामाजिक रुपान्तरणफे विकासके महत्वपूर्ण पाटो रहल बटैले बटी ।

सभा नेपालके आयोजना तथा फाउण्डेशन च्यानल ओ यूएन बुमनके सहकार्यमे शनिच्चरसे सुरु हुइल तीन दिने नेतृत्व लैङिकता ओ स्थानीय स्तरमे सहभागिता विषयक अभिमुखीकरण कार्यक्रममे बोल्टी उहाँ उ बाट बत्वाइल रहिट । ‘आम मनैनके कन्सेप्टमे डगरघाट, भवन, भौतिक पूर्वाधार बन्ना केल विकास हो,’उहाँ कहली–मने उ संगे सामाजिक रुपान्तरण हुइनाफे विकासके एक ठो महत्वपूर्ण पाटो हो, सामाजिक रुपान्तरण विना समाजमे परिवर्तन नइहुईसेकी । महिलाहुकनके भान्सामे केल निर्णय चलठ आब उहाँ केल नाही जीवन जिएक लाग सक्कु ओरसे निर्णय करे पाइल परल उहाँ कहली । महिला हरेक क्षेत्रमे पाछे परल ओरसे आब नेतृत्व लेहक लाग आघे बह्रे पर्ना उहाँ कहली ।

धनगढी उपमहानगरपालिका–५ के अध्यक्ष हिरासिंह पाताली महिलाहुकनके नेतृत्व विकास विना लैङिक हिंसामे न्यूनिकरण हुई नइसेक्ना बटैलै ।
बुमन एक्टके कार्यक्रम संयोजक सरिता चौधरी महिलाहुकन नेतृत्वमे नानेक टमान मेरिक कार्यक्रमके आयोजना करल बटैली । उहाँ महिलाहुकनके लाग पिपि सेट, मास्क, टकिया तन्ना बनैना तालिमफे डेहल बटैली ।

सभा नेपालके जिल्ला संयोजक दलबहादुर ओलीके अध्यक्ष्तामे हुइल उदघाटन कार्यक्रममे संचालन ज्ञानेन्द्र शर्मा करले रहिट । अभिमुखीकरण कार्यक्रममे धनगढी उपमहानगरपालिका, गोदावरी ओ कैलारी गाउँपालिकाके टमान क्षेत्रमे कार्यरता महिलाहुकने सहभागिता रहल बा ।