निसर्ग हस्पिटलसे ‘टेलीमेडिसिन सेवा’ संचालन

पहुरा समाचारदाता
धनगढी,३२ सावन । निसर्ग हस्पिटल एण्ड रिसर्च सेन्टरसे सुदूरपश्चिममे पहिल चो ‘टेलीमेडिसिन सेवा’ सञ्चालनमे नन्ले बा । सुदूरपश्चिमके पहाडी जिल्लाके नागरिकहे समेत विशेषज्ञ स्वास्थ्य सेवाके पहुँचमे नन्ना उद्देश्यअनुसार प्रदेशमे पहिल बार ‘टेलीमेडिसिन सेवा’ सञ्चालनमे नानल हस्पिटल जनैले बा ।

निसर्ग हस्पिटलमे कार्यरत विशेषज्ञ चिकित्सकसे ‘टेलीमेडिसिन सेवा’ के माध्यमसे सातु पहाडी जिल्लाके बिरामीहे आवश्यक परामर्श तथा उपचार सेवा प्रदान कैना हस्पिटलके स्वास्थ्य
निर्देशक डा.मिराजआलम अन्सारी जानकारी डेलै ।

हस्पिटलके अध्यक्ष तीर्थराज पन्त सोम्मारसे बझाङसे टेलीमेडिसिन सेवा’ सुरु करल बटैटी हाली और जिल्लामे फे विस्तार कैना जनैलै । जीआईजेड ओ मिदास टेक्नोलोजी प्राइभेट लिमिटेडसंंगके सहकार्यमे बझाङके देउलेख प्राथमिक स्वास्थ्य केन्द्रसे ‘टेलीमेडिसिन सेवा’ सञ्चालनमे नानल उहाँ बटैलै । ‘टेलीमेडिसिन सेवा’ मार्फत स्वास्थ्य परीक्षण तथा परामर्श लेलेसे शुुल्क भर नइलागी ।
‘टेलीमेडिसिन सेवासे विशेषज्ञ स्वास्थ्य सेवाके लाग पहाडी जिल्लासे धनगढी लगायतके ठाउँ जाई पर्ना बाध्यता हट्न विश्वास समेत लेहल बा । सुदूरपश्चिमके सामाजिक विकास मन्त्रालयके अनुसार प्रदेशमे अभिनसम कौनो फे अस्पताल ‘टेलीमेडिसिन सेवा’ सञ्चालन करले नइहो । सेतीप्रादेशिक अस्पतालमे सेवा सञ्चालनके लाग बजेट विनियोजन करलेसेफे हालसम सञ्चालनमे आई नइसेकल हो । निजी तथा सरकारी स्तरसे प्रदेशमे ‘टेलीमेडिसिन सेवा’ सञ्चालनमे नइरहल बेला निसर्ग हस्पिटलसे सुरु करल हो ।