जारी निषेधाज्ञा भदौ १० गतेसम ठपल

पहुरा समाचारदाता
धनगढी, ३२ सावन । कैलालीमे जारी निषेधाज्ञा फेनसे लम्ब्याइल बा । जिल्लामे कोरोना संक्रमणदर कायमे रहल ओरसे प्रशासनसे भदौ १० गतेसम निरन्तरता डेहल हो ।
प्रमुख जिल्ला अधिकारी खगेन्द्र प्रसाद रिजालके अध्यक्षतामे बैठल जिल्ला कोभिड–१९ संकट व्यवस्थापन केन्द्रके बैठकसे १० दिन अर्थात भदौ १० गतेसम निषेधाज्ञा लम्ब्याइना निर्णय करल हो । इहीसे आघे जारी करल निषेधाज्ञा सोम्मार रात १२ बजे ओराइल बा ।
ओस्टके कञ्चनपुरमे जारी निषेधाज्ञा फेन लम्ब्याइल बा ।
कञ्चनपुरमे फेन संक्रमणदर कायमे रहल ओरसे प्रशासनसे भदौ १० गतेसम निरन्तरता डेहल हो । प्रमुख जिल्ला अधिकारी रामप्रसाद पाण्डेके अध्यक्षतामे बैठल जिल्ला कोभिड–१९ संकट व्यवस्थापन केन्द्रके बैठकसे १० दिन अर्थात भदौ १० गतेसम नषेधाज्ञा लम्ब्याइना निर्णय करल हो । कञ्चनपुरमे फेन इहीसे आघे जारी करल निषेधाज्ञा सोम्मारके रात १२ बजे ओराइल बा ।
