महिला अधिकारके सम्मान, सरकारी कर्मचारीहे आममाफी
काठमाण्डौं, २ भदौ । अफगानिस्तान कब्जा करल विद्रोही समूह तालिबानसे पहिलचो पत्रकार सम्मेलन करले बा । मंगर रात काबुलमे हुइल पत्रकार सम्मेलनमे तालिबानके नेताहुक्रे अपनेहुक्रे कौनो फेन नागरिकहे दुःख डेहे नैचाहल बटाइल बीबीसी जनैले बा ।
पत्रकार सम्मेलनमे प्रवक्ता जबिहुल्लाह मुजाहिद दुई दशकके संघर्षपाछे देशहे विदेशीहुक्रनके कब्जासे मुक्त कैना सफल हुइल ओ इ देशके लाग गर्वके विषय हुइल बटैले बाटै । अफगानिस्तानहे अब युद्धभूमि बनाइ नैडेना उल्लेख कैटी प्रवक्ता मुजाहिद आपन विरुद्ध लागल सक्कु सरकारी कर्मचारीहे आममाफी डेहल बटैलै ।
महिला अधिकारके सम्मान करुइयाके तालिबानके कहाइ बा । महिलाहुक्रे सरिया कानुन माने पर्ना मने उहाँहुक्रे डराइ पर्ना कारण नैरहल बटैटी प्रवक्ता मुजाहिद महिलाहुक्रनसे काँधमे काँध मिलाके आघे बह्रना बटैलै । अपनेहुक्रे आब कौनो फेन शत्रु नैचाहल बटैटी तालिबानसे अन्तर्राष्ट्रिय समुदायसे मिलके काम कैना चाहल बटैले बाटै । ओस्टके तालिबानसे आपन सांस्कृतिक ढाँचा भिट्टर रहिके निजी क्षेत्रके सञ्चारमाध्यम निष्पक्ष ओ स्वतन्त्र हुइ पैनामे फेन ढुक्क रहना आग्रह करल बा ।
तालिबानसे नयाँ सरकार गठनके तयारी फेन करटी रहल बा । पाछेक कुछ दिनके तुलनामे मंगरके काबुलके अवस्था शान्त रहल बीबीसी जनैले बा । तालिबानसे नियन्त्रणमे लेहल टिसरा दिन लडाकुहुक्रनके व्यापक उपस्थिति रहलेसे फेन राजधानी काबुलके सडक शान्त डेखल खबरमे उल्लेख बा ।
