गेटा मेडिकल कलेज सञ्चालनके लाग दबाब डेना साझा सहमति
पहुरा समाचारदाता
धनगढी, २ भदौ । प्रस्तावित निर्माणधिन गेटा मेडिकल कलेज सञ्चालनमे ढिलाइ हुइल कहटी कलेज सञ्चालनके लाग दबाब डेना साझा सहमति कैगिल बा ।
कैलालीके सरोकारवाला, राजनीतिक दल तथा नागरिक समाजके अगुवा कलेज सञ्चालन कैना केन्द्र सरकार समक्ष एक जुट होके दबाब डेहे पर्ना जोड डेहल हुइट । बुधके कैलाली उद्योग वाणिज्य संघके पहलमे आयोजित सर्वदलीय, सर्वपक्षीय छलफलमे सहभागीहुक्रे प्रस्तावित मेडिकल कलेजहे तत्काल सञ्चालनमे लानक लाग एकजुट होके केन्द्रमे दबाब डेना सहमति करल हुइट ।
प्रस्तावित मेडिकल कलेज अन्तर्गत भौतिक संरचना निर्माण कार्य सम्पन्न हुइलेसे फेन कलेज सञ्चालनमे राज्यसे ध्यान नैडेहल कहटी सक्कु जाने केन्द्रहे दबाब डेहे पर्नामे सरोकारवाला जोड डेहल हुइट ।
प्रस्तावित गेटा मेडिकल कलेज पूर्वाधार निर्माण समितिके अध्यक्ष डाक्टर चेतराज पन्त भौतिक संरचना निर्माणके काम सम्मन्न हुइल बटैले । उहाँ भवनसे निक्रना पानीके व्यवस्थापन ओ बत्ती जडान कार्य किल हुइना बाँकी रहल बटैलै ।
‘भौतिक संरचना निर्माण कार्य अन्तिम चरणमे पुग्लेसे फेन कैसिक सञ्चालन कैना कना अन्योल कायमे रहल बा,’ उहाँ कहलै,‘अइसीन अवस्थामे राज्यहे दबाब डेना आवश्यक रहल बा ।’ सुदूरपश्चिमाञ्चल विश्वविद्यालयके पूर्व रजिष्टार डा. हेमराज पन्त सुदूरपश्चिमके सक्कु प्रदेशसभा सदस्य ओ प्रदेशके मन्त्रीहे कलेजके अवधारणबारे विज्ञ टोली गठन कैके प्रष्ट पर्ना आग्रह करलै ।
‘सबसे पहिले इ कलेज बनैना वा प्रतिष्ठान बनैना अथवा यूनिभर्सिटी बनैना कना प्रष्ट हुइना आवश्यक बा,’ डाक्टर पन्त कहलै,‘ओकर लाग विज्ञके टोली निर्माण कैना आवश्यक बा, उहे सुझावके आधारमे केन्द्रहे दवाव डेहे पर्ना डेखजाइठ् ।’ उहाँ सक्कु जनहनके साझा प्रयास हुइलेसे किल मेडिकल विश्वविद्यालय बनैना सम्भव रहल धारणा राखल रहिट ।
ओस्टके सेती प्रादेशिक अस्पतालके पूर्व मेडिकल सुपरिटेन्डेन्ट डा. गणेशबहादुर सिंह सुदूरपश्चिम प्रदेश स्वास्थ्य क्षेत्रमे पाछे परल बटैटी प्रस्तावित मेडिकल कलेजहे मेडिकल विश्वविद्यालयके रुपमे आघे बह्रैना बटैलै ।‘इहे प्रदेशके शेरबहादुर देउवा अब्बे देशके प्रधानमन्त्री बाटै,’ डाक्टर सिंह कहलै, ‘अब्बे हम्रे सक्कु जाने एकजुट होके दबाब डेके विश्वविद्यालय बनाइ सेकब ।’
नेकपा एमालेके कैलाली सचिव रणबहादुर चन्द अनेक बहानामे नैअलझके तत्काल ज्या सेकजाइ ओहे अनुसार सेवा सञ्चालन करे पर्नामे जोड डेलै । कैलाली बहुमुखी क्याम्पसके स्ववियु सभापति चुडामणी भट्ट सक्कु विद्यार्थी संगठन एकजुट होके प्रस्तावित मेडिकल कलेजहे सञ्चालन कराइक लाग राज्यहे दबाब डेहे पर्ना बटैलै । कैलाली उद्योग वाणिज्य संघके अध्यक्ष पुष्पराज कुँवरके अध्यक्षतामे कार्यक्रम सञ्चालन हुइल रहे ।
