कागजपत्र नइरहल सोनके गहना सहित २ जाने पक्राउ

पहुरा समाचारदाता
बर्दिया, २ भदौ । गुलरिया नगरपालिका–८ भादा पुलसे कागजपत्र (बिलभरपाई) नइरहल करिब ६ लाख ४८ हजार ५ सय ५ रुपैयाँ मूल्य बराबरके ८६.६४ ग्राम सोनसहित २ जनहनहे प्रहरी पक्राउ करले बा ।

पक्राउ परुइयामे गुलरिया नगरपालिका–७ बैठना २४ वर्षीय दिपेन्द्र सिंह ओ उहे नगरपालिका–३ बैठना २३ वर्षीय अशोक लोध रहल बटै । उ स्थानमे आघे लु.६२ प ६२२६ ओ पछाडी लु.६२ प ६८२६ नम्बर लिखल स्कुटरहे जिल्ला प्रहरी कार्यालय बर्दियासे खटल प्रहरी जाँच कैना क्रममे डिक्कीभिटर उ परिमाणके सोन फेला पारके स्कुटरमे सवार ओइनहे पक्राउ करल हो ।

ओइनहे बरामद सोनसहित आवश्यक कारवाहीके लाग राजश्व अनुसन्धान कार्यालय कोहलपुर बाँकेमे पठाइल जिल्ला प्रहरी कार्यालय बर्दिया जनैले बा ।