थरुहट आन्दोलनहे नागरिक अगुवाके साथ
काठमाडौँ, ३ भदौ । कैलालीके टीकापुरमे थरुहट, थारुवान आन्दोलन हुइल ६ बरस पुगल अवसरमे काठमाडौंमे प्रदर्शन हुइल बा ।
थरुहट थारुवान राष्ट्रिय मोर्चाके आयोजनामे बुधके, बिफे ओ शुकके तीन दिन काठमाडौंके माइतीघरमे प्रदर्शनके कार्यक्रम रहल बा । प्रदर्शन ओ धर्नामे सहभागीे सांसद रेशम चौधरीके रिहाइ, गिरिशचन्द्र लाल नेतृत्वके आयोगके प्रतिवेदन सार्वजनिक, टीकापुर घटनामे दोषी ठहर होके जेलमे रहलहे रिहाइ कैना माग करले बाटै ।
प्रदर्शनमे बृहत नागरिक आन्दोलन फेन सहभागी रहल बा । प्रदर्शनमे नारायण वाग्ले, खगेन्द्र संग्रौला लगायतके नागरिक फेन सहभागी रहल बाटै । प्रदर्शनमे सांसद रेशम चौधरीके छावा फेन प्लेकार्डसहित सहभागी हुइल बाटै ।
थारु समुदाय बहुल क्षेत्र छुट्टे प्रदेशके माग कैटी कैलालीके टीकापुरमे थारु समुदायसे करल प्रदर्शनके क्रममे नेपाल प्रहरीका एसएसपी लक्ष्मण न्यौपानेसहित ८ जनहनके ज्यान गैल रहे । उ घटनामे दोषी ठहर हुइल सांसद रेशम चौधरी हाल कारागारमे रहल बाटै ।
