नाटक मार्फत न्याय खोज्टी थारू समुदाय

काठमाडौं, ४ भदौ । काठमाण्डौंके माइतीघर मण्डलामे हुइल थरूहट आन्दोलनमे नाटक मार्फत थारु समुदाय आपन हक अधिकार ओ न्याय खोजल डेखागिल बा ।

कैलालीके टीकापुरमे थरुहट, थारुवान आन्दोलन हुइल ६ बरस पुगल अवसरमे थरुहट थारुवान राष्ट्रिय मोर्चाके आयोजनामे माइतीघरमे हुइल आन्दोलनमे नाटक मार्फत हक अधिकार ओ न्यायके खोजी ओ शोषक सामान्तहुक्रनसे थारु समुदाय उपर हुइना अन्याय अत्याचार ओ उहाँहुक्रनके चरित्र डेखाइल खोजल रहे । ओस्टके टमान प्रपञ्च रचके शोषक वर्ग सिधासादा थारुहुक्रनके जग्गा जमिन, धन सम्पत्ति कैसिक हत्याइलै कहटी नाटक मार्फत डेखाइ खोजल रहे ।

ओस्टके बिफेक रोज प्रर्दशनके कार्यक्रममे नागरिक समाजके अगुवाहुक्रनके सहभागिता रहल रहे । प्रदर्शनमे नारायण वाग्ले, खगेन्द्र संग्रौला लगायतके नागरिक समाजके अगुवाहुक्रे सहभागी जनाइल रहिट । प्रदर्शनमे सांसद रेशम चौधरीके छावा फेन प्लेकार्डसहित सहभागी हुइल रहिट ।

प्रदर्शन ओ धर्नामे सहभागी सांसद रेशम चौधरीके रिहाइ, गिरिशचन्द्र लाल नेतृत्वके आयोगके प्रतिवेदन सार्वजनिक, टीकापुर घटनामे दोषी ठहर होके जेलमे रहलहे रिहाइ कैना माग करले बाटै ।

संविधान लेखनके क्रममे २०७२ भदौ ७ गते कैलालीके टीकापुरमे थरुहट आन्दोलनकारी ओ प्रहरीबीच दोहोरो झडप होके ८ प्रहरीसहित १ नाबालकके ज्यान गैल रहे । घटना हुइल डोसर दिन सकारे कफ्फ्र्यु जारी हुइल समयमे ८० से ढिउर थारु समुदायके घर, पसल, एफएम लगायतमे आजजनी हुइल रहे । उक्त घटनाके मुद्दामे सांसद रेशम चौधरीसहित नेता कार्यकर्ता जेल सजाय भोग्टी रहल बाटै ।