कञ्चनपुरमे प्रहरी ओ शिक्षकबीच झडप, १७ जाघे घाहिल

पहुरा समाचारदाता
धनगढी, ४ भदौ । कञ्चनपुरमे प्रहरी ओ शिक्षकबीच शुकके झडप हुइल बा । दरबन्दी मिलानके विषयहे लेके शिक्षकहुक्रे भीमदत्त नगरपालिकामे लगाइल ताला प्रहरी खोलल् पाछे झडप हुइल हो ।

झडपमे परके प्रहरीसहित १७ जाने घाहिल हुइल बाटै । घाहिल हुउइयामे ९ जाने प्रहरी, ६ जाने शिक्षक ओ २ जाने नगरपालिकाके कर्मचारी रहल जिल्ला प्रहरी कार्यालय कञ्चनपुर जनैले बा ।

नगर शिक्षा समितिसे करल दरबन्दी मिलानप्रति असहमति जनैटी नेपाली कांग्रेस निकट शिक्षक संघसे भीमदत्त नगरपालिकाके मूलगेटमे शुकके तालाबन्दी करल रहे ।

नगरपालिकाके मूलगेटमे लगाइल ताला प्रहरी खोल्ना क्रममे झडप हुइल प्रहरी जनैले बा । झडपसे उग्ररुप लेहलपाछे स्थितिहे नियन्त्रणमे लेना प्रहरी कुछ सेल अश्रुग्यास समेत प्रहार करल रहे ।