झोलुङ्गे पुल ओ वडा कार्यालय भवनके उद्घाटन

पहुरा समाचारदाता
हसुलिया, ४ भदौं । कैलालीके कटैनी लडियामे झोलुङ्गे पुल निर्माण हुइल बा । कैलारी गाउँपालिका–७ बड्का बसन्तामे झोलुङ्गे पुल निर्माण करल हो ।

गाउँपालिकाके अध्यक्ष लाजुराम चौधरी एक कार्यक्रमकाबीच शुकके झोलुङ्गे पुलके उद्घाटन करल रहिट । १२० मिटर लम्मा उ पुल कैलारी गाउँपालिकाके ९५ लाख रुपैयाँ लागतमे निर्माण करल हो ।

झोलुङ्गे पुल नैहोके बड्का बसन्ता, बैजपुर, रतनपुर, नारायणपुर, मोहनपुर लगायतके गाउँके स्थानीय खेप्टी आइल रहिट । उहाँहुक्रनके समस्याहे दृष्टिगत कैके गाउँपालिकाके कार्यालयसे झोलुङ्गे पुल निर्माण करल हो । गैल बरससे निर्माण कार्य सुरु हुइल रहे ।

उ पुल निर्माण हुइलसंगे काठेपुलसे ओहोरदोहोर करे पर्ना बाध्यता हटल वडा नम्बर ७ के वडा अध्यक्ष कमलप्रसाद चौधरी बटैलै । इहीसे आघेसम स्थानीयवासी काठेपुलके भरमे ओहोरदोहोर कैटी आइल रहिट । बर्खामे बाढुसे कठुुवाके पुल पुहाके आउजाउ नै ठप्प हुइना करल रहे ।

इहे बीच, वडा नम्बर ७ वडा कार्यालयके नवनिर्मित भवनके फेन उद्घाटन करल बा । गाउँपालिकाके अध्यक्ष चौधरी वडा कार्यालय भवनके उद्घाटन करल रहिट । कैलारी गाउँपालिकाके करिब ५८ लाख रुपैयाँ लागतमे वडा कार्यालय भवन निर्माण करल हो ।

वडाध्यक्ष कमलप्रसाद चौधरीके अध्यक्षतामे हुइल उद्घाटन कार्यक्रममे गाउँपालिकाके प्रमुख प्रशासकीय अधिकृत खगेन्द्रराज जोशी, स्वास्थ्य शाखा प्रमुख वीरेन्द्र सापकोटा, योजना शाखा प्रमुख सन्तोषकुमार चौधरीसहित वडा सदस्य, स्थानीयवासी, वडाके कर्मचारीके उपस्थिति रहल रहे ।