सुदूरपश्चिमके सांसद कहठैः रेशम ओ हमार डगरा अलग होगैल
पहुरा समाचारदाता
धनगढी, ४ भदौ । निलम्बित सांसद रेशमलाल चौधरी आपन गृह जिल्ला कैलालीमे अकली हुइल पाइल बा ।
तटस्थ बैठल उहाँ अन्ततः अपने महन्थ ठाकुर पक्षसे दर्ता करे लागल नयाँ पार्टी जनता समाजवादी पार्टी नेपाल (लोकतान्त्रिक) मे रहल मन्जुरीनामे पत्र निर्वाचन आयोगहे डेले बाटै । मने ओहकान गृह जिल्लाके अधिकांश नेता तथा कार्यकर्ता उपेन्द्र यादव नेतृत्वके जनता समाजवादी पार्टीमे रहल पाइल बा । जौन कारण उहाँ पार्टीभिट्टर अक्केली हुइल हुइट ।
सांसद चौधरीके पदचाप पछ्याइटी आइल सुदूरपश्चिम प्रदेशके सांसद समेत यादव नेतृत्वके जनता समाजवादी पार्टी ओर लागलपाछे उहाँ पार्टीभिट्टर कमजोर डेखल हुइट ।
इहीसे आघे रेशमलाल चौधरीके तटस्थ रहना कदमहे समर्थन करल बटैटी आइल सुदूरपश्चिम प्रदेश सभामे जसपा संसदीय दलके नेता कृष्णबहादुर चौधरी ओ प्रमुख सचेतक मालामति राना संस्थापन पक्षहे रोज्ले बाटै ।
संसदीय दलके नेता चौधरी कहलै, ‘पहिले उहाँ तटस्थ बैठल रहिट । उहाँके स्वतन्त्रताके बात हो । उहाँ नयाँ पार्टीहे समर्थन जनैलै । अब्बेसमके सिनारियो अनुसार उहाँ नयाँ ओर डेखगैल बाटै । मने अध्यादेशसे डेहल समयावधि २१ दिन हो । २१ दिनपाछे के कहाँ बा ? ओकरपाछे किल पता चली ।’
ओस्टके प्रमुख सचेतक राना रेशम ओ आपनहुक्रनके डगरा फरक–फरक डेखल बटैली । अपने पहिलेसे संस्थापन पक्ष तथा चुनाव चिन्हप्रति अडिग रहल बटैटी उहाँ फरक–फरक डगराम्े लग्टी किल मुद्धा फरक नैरही । आभिन फेन समय बा ।’
२ सांसद किल नैहुइट जनता समाजवादीके अधिकांश केन्द्रीय सदस्य संस्थापन पक्षओर लागल बटाइल बा । जसपा केन्द्रीय सदस्य तथा सुदूरपश्चिम संयोजक कृष्णकुमार चौधरी सुदूरपश्चिममे रहल करिब ३० जाने केन्द्रीय सदस्य मध्ये अधिकांश सदस्य आपनओर रहल ओ कुछ आभिन खुल्ना बाँकी रहल बटैलै ।
