न्युजिल्यान्डमे डेल्टा भरियन्ट डेखाइलपाछे कडा लकडाउन
काठमाडौं, २ भदौं । एकदम संक्रामक मानल कोरोना भाइरसके डेल्टा भेरियन्ट पुष्टि हुइलमे न्युजिल्यान्ड फेन थपल बा । न्युजिल्यान्डके सबसे भारी सहर अकल्यान्डके अस्पतालमे एक ५८ वर्षिय पुरुषमे मंगरके रोज कोरोना पुष्टि हुइल हो ।
उहाँ कन्ट्याक्ट ट्रेसिङसे ७ जहनमे भाइरस डेखाइल बा । छ महिनायहोर न्युजिल्यान्डमे कोरोनाके कौनो फेन नयाँ संक्रमित डेखाइल नैरहे ।
कोरोनाके संक्रमित मिललपाछे न्युजिल्यान्डमे कडा लकडाउन लागू करल बा । मंगरके रातसे सात दिनके लाग लकडाउन करल हो ।
न्युजिल्यान्डके प्रधानमन्त्री जेसिन्डा आर्डनके अनुसार जिनोम सिक्वेन्सिङसे हेरलेसे अस्ट्रेलियामे फैलल डेल्टा भेरियन्ट न्युजिल्यान्डमे डेखाइल हो । आर्डन कलि, ‘हमार केस अस्ट्रेलियासे उत्पत्ति हुइल हो । यी कैसिक हमारमे छिरल हम्रिहिनहे खोजेपरना बा ।’
हालसम १४२ ठो देशमे डेल्टा भेरियन्ट डेखाइल बा । न्युजिल्यान्डके स्वास्थ्य महानिर्देशक आश्ले ब्लुमफिल्ड अहिलेडेखाइल केस हेरलेसे ५० से १२० से ढेरमे डेल्टाके भेरियन्ट डेखैना बटैठि । ‘हमार काम आब कौनो फेन केश नैछोरना मेरिक करे खोज्ना हो,’ उहाँ कलि ।
सरकारी अधिकारी अभिन फेन न्युजिल्यान्डमे डेल्टा भेरियन्ट समुदायमे कैसिक डेखाइल कहिके अध्ययन करटैं । कोरोना भाइरसके केस नैडेखाइलपाछे न्युजिल्यान्ड सामान्य जीवनमे लौटल रहे । एक वर्षआघे वर्षसे पर्यटक अइना सब मार्ग बन्द करल बा कलेसे अत्यावश्यक काम परलहे कहु जाइक परलेसे अनिवार्य क्वारेन्टाइन बैठ्ना कहल बा ।
हालसम न्युजिल्यान्डमे २ हजार ८७१ जहनमे कोरोना संक्रमण डेखाइल ओ २६ जहनके मृत्यु हुइल बा । अस्टेक जनसंख्याके २२.९ प्रतिशत कोभिड विरुद्धके पूर्ण मात्राके खोप पैले बटैं कलेसे ४० प्रतिशत एक मात्राके खोप पैले बटैं ।
