मोर्चा आज विद्रोह दिवस मनैटी
पहुरा समाचारदाता
धनगढी, ७ भदौ । थारु कल्याणकारिणी सभा ओ थरुहट/थारुवान राष्ट्रिय मोर्चा कैलालीके संयुक्त आयोजनामे आज टीकापुर विद्रोह दिवस मनाई लागल बा ।
कैलालीके टीकापुरमे हुइल टीकापुर घटनाके भदौ ७ गते ६ बरस पुग्टी बा ।
देश संघीयकरणके प्रक्रिया रहल, संघीय लोकतान्त्रिक गणतन्त्रके संविधान जारी हुई लागल वेला उ क्षेत्रमे का कैसिन प्रदेश रचना कैना उपयुक्त हुई कना राष्ट्रिय बहसके सन्दर्भमे वि.स. २०७२ साल भदौ ७ गते कैलाली जिल्लाके टिकापुरमे हुइल जनविद्रोहसे उ घटना हुइल रहे ।
उत्तर–दक्षिण ‘सुदुरपश्चिम’के सट्टा पूर्वपश्चिम सीमांकनमे आधारित ‘थरुहट’ प्रदेशके माग करटी उ दिनके टिकापुर जनप्रदर्शन ओ सभामे ३० हजारसे ढेर स्थानीय जनसमुदायसे भाग लेहल मोर्चाके दाबी बा ।
टिकापुर जनविद्रोहके क्रममे एक वालक सहित ७ जानेक निधन हुइना निश्चय दुःखद ओ दुर्भाग्यपूर्ण रहे । मने उ न आयोजकके ओरसे प्रयोजित घटना रहे न जनप्रदर्शन ओ न सभामे सामेल जनसमुदायके उद्धेश्य अनुरुप मोर्चा कहले बा । उ कुछ तत्वसे अबान्छित तबरसे आन्दोलनहे बदनाम कैना, राजनीतिक मुद्धाहे अपराधिक करार कैना करल षडयन्त्र केल करल मोर्चा कहले बा ।
उ घटनाहे लेके थरुहट/थारुवान मोर्चा टीकापुर विद्रोहके रुपमे गैल कुछ बरससे मनैटी आइल मोर्चाके कैलाली जिल्ला संयोजक माधव चौधरी बटैलै । इ बरस थारु कल्याणकारिणी सभा ओ थरुहट थारुवान राष्ट्रिय मोर्चा कैलालीके संयुक्त आयोजना टीकापुर विद्रोहके रुपमे मनैना उहाँ जनैलै ।
मोर्चासे आज कैलालीके बलिया चौकसे भल्का चौकसम विशाल ¥याली सहित कार्यक्रमके आयोजना कैटी रहल जनैले । कार्यक्रमहे सफल बनाइ लाग टमान समिति बनाइल उहाँ संयोजक माधव थारु बटैलै ।
ओस्टेक शनिच्चरके बैठकसे २०७८ भदौ ७ गते विद्रोह दिवस मनैना ओकर डोसर दिन भदौ ८ गते साझ ८ बजेसे आधा घण्टा जिल्ला व्यापी बत्ती बुटैना (ब्ल्याक आउट) कैना संयोजक थारू जानकारी डेलै ।
समानता, न्याय, अधिकारके लाग आन्दोलनमे उत्रे परल मोर्चा जनैले बा । उहाँहुक्रे टीकापुर घटनाके राजबन्दीहुक्रनहे रिहाई संगे सक्कु मुद्दा फिर्ता लेहे पर्ना, सांसद रेशम चौधरीके रिहाइ, गिरिशचन्द्र लाल नेतृत्वके आयोगके प्रतिवेदन सार्वजनिक करे पर्ना लगायतके माग रख्टी आइल बटै ।
