जाँई थारु देउथानके उद्घाटन
पहुरा समाचारदात
धनगढी, ७ भदौ । धनगढी उपमहानगरपालिका वडा नम्बर ५ जाँई गाउक ‘थारु देउथान’ के उद्घाटन सोम्मारके रोज भव्य कार्यक्रमके विच हुइल बा ।
उ देउथानके उदघाटन प्रतिनिधि सभा सदस्य तथा पूर्व वन तथा वातावरण मन्त्री माननीय नारादमुनी राना करल रहिट । थारु परम्पराअनुसार अखरीया खेलपाछे देउथानके उदघाटन कैगिल रहे । देउथानके उद्घाटन करटी सांसद राना संंसद पद रहलेसे उप्पर तल्लामे इटा ठप्ना सहयोग कैना प्रतिवद्धता जनैलै ।
उ थारु देउथान बनाइक लाग प्रतिनिधि सभा सदस्य रानाके पहलमे स्थानीय पूर्वाधार विकास साझेदारी कार्यक्रमसे गैल बरस २० लाख ओ यी बरस १५ लाख बजेट विनियोजन करल थारु देउथान भवन उपभोक्ता समितिके अध्यक्ष तथा गाउँक भल्मन्सा कुलविर चौधरी बटैलै । ओस्टेक करके भवन निर्माणके लाग जाँई गाउँबासी पोहोर साल २ लाख २५ हजार ओ असौक साल १ लाख ९२ हजार रुप्या बराबरके जनश्रमदान करल उहाँ बटैलै ।
थारु देउथान उद्घाटन कार्यक्रममे धनगढी उपमहानगरपालिका वडा नम्बर ५ अध्यक्ष हिरासिंह पतली, वडा नम्बर ६ के अध्यक्ष भागीराम चौधरी, नेकपा एमाले जिल्ला उपाध्यक्ष रण बहादुर चन्द, समैची सामुदायिक वन उपभोक्ता समुहके अध्यक्ष प्रकाश बोगटी, समाजसेवी महिला अगुवा दुर्गा कुश्मी लगायत मन्तव्य व्यक्त करल रहिट । उहे अवसरमे टमान जनहनहे सम्मानफे कैगिल रहे ।
थारु देउथान भवन उपभोक्ता समितिके अध्यक्ष तथा गाउँक भल्मन्सा कुलविर चौधरीके अध्यक्षतामे हुइल कार्यक्रमके पूर्व भल्मन्सा तथा बरघर महटवा समाजके वरिष्ठ केन्द्रीय उपाध्यक्ष विनय चौधरी स्वागत मन्तव्य व्यक्त करल रहिट ।
भुई तल्ला बनल थारु देउथानके उप्पर तल्ला ठप्टी थारु संग्राहलय बनैना योजना समेट रहल भल्मन्सा बटैलै, यद्यपि थारु देउथान जाईमे मिनि संग्राहलयके रुपमे अब्बेफे गाउँघरमे मिल्ना परम्रागत टमान चिज धारल बा ।
देउथानसंग्गे सभाहल बनलपाछे योजना निर्माण कैना, गाउँक सरसल्लाह कैना सहजुल हुइल उहाँ बटैलै । थारु देउथानमे जाँई गाउँबासी हरेरी पूजा, हरेरी महोत्सव, सामुहिक अष्टिमकी टिक्नासे लेके माघी टिहुवार मनैनाके साथे खोजनीबोजनी कार्यक्रम करटी आइल बटै ।
उहे विच जाई गाउँबासी हरेरी पूजा करले बटै । बरका गुरुवा दलबहादुर दहितके नेतृत्वमे हरेरी पुजा करल गाउँक भल्मन्सा कुलविर चौधरी बटैलै ।
