प्रदेश सरकारसे राजपत्र छप्ना सुरु
पहुरा समाचारदाता
धनगढी, ८ भदौ । सुदूरपश्चिम प्रदेशमे प्रदेश सरकारसे राजपत्र छप्ना सुरु करले बा ।
सुदूरपश्चिम प्रदेश आन्तरिक मामिला तथा कानुन मन्त्रालयसे अपने मुद्रण मेसिन जडान कैके मंगरसे छपाइके काम सुरु करल हो ।
सुदूरपश्चिमके आन्तरिक मामिला तथा कानुन मन्त्री पूर्णा जोशी मेसिनके पुजापाठ कैके उद्घाटन करल रही । उहे अवसरमे बोल्टी मन्त्री जोशी इहीसे आघे राजपत्र छपाइक लाग संघिय मुद्रण विभागमे पठाइ पर्र्ना बाँध्यता रहल बटाइल रही । उहाँ कहली–‘प्रदेशके ऐन, कानुन, कार्यविधि, मापदण्ड तथा सरकारके निर्णय कार्यान्वयन कैना राजपत्रमे छापे परठ् ।’
मन्त्री जोशी इहीसे आघे काठमाडौंके मुद्रणमे राजपत्र छपाईमे ढिलाई करेबर प्रदेश सरकारके निर्णय कार्यान्वयन कैनामे समस्या हुइना करल बटैली । उहाँ कहली–‘मुद्रण विभागसे इ प्रदेशसे पठाइल ऐन, कार्यविधि, निर्णय छपाई कैना तीन महिनासे ढिउर समय लगैना करल रहे ।’
ओहकान अनुसार प्रदेश सरकारके दर्जनौ कागजपत्र मुद्रण विभागमे महिनौसे छपाईके क्रममे रहल बटैली । उहाँ कहली–‘आब प्रदेशमे मेसिन आसेकल बा । प्रदेश सरकार ओ स्थानीय तहके आवश्यक निर्णय यहै छापजैना बा ।’
उहाँ प्रदेश सरकारसे मुद्रण मेसिन जडान करलसंगे प्रदेश सरकारहे सहज हुइना बटैली । उहाँ कहली–‘मेसिन लानलपाछे समयमे प्रदेश सरकारके निर्णय राजपत्रमे छापजैना ओ कार्यान्वयन फेन हाली हुइ ।’
मन्त्रालयके प्रवक्ता मोहनराज जोशी प्रदेश सरकारके आर्थिक बरस २०७७/७८ के वार्षिक बजेटमे प्रदेशमे मुद्रण मेसिन खरिद तथा जडान कैना कार्यक्रम उल्लेख रहल बटैलै । उहाँ कहलै–‘आर्थिक बरसके अन्त्यमे मेसिन प्रदेश सरकारसे खरिद करलेसे फेन जडान कैना ढिलाई हुइल ओरसे सञ्चालन करे नैसेकल रहे ।’ उहाँ उ मेसिन २७ लाख ८० हजारमे खरिद कैके जडान करल बटैलै ।
