लम्साल नेतृत्वमे प्रदेश कमिटी गठन

पहुरा समाचारदाता
धनगढी, ९ भदौ । राष्ट्रिय जनमोर्चा नेपाल सुदूरपश्चिममेफे विवाद उत्पन्न हुइल बा ।

जनमोर्चा एक पक्षधरसे प्रदेश नेतृत्व असक्षम हुइल कहटी विद्रोह करके प्रदेश पार्टी कमिटि पुर्नगठन करले बा । मंगर ओ बुध (आज) धनगढीमे हुइल राष्ट्रिय जनमोर्चा सुप प्रदेशके अगुवा नेता कार्यकर्ता प्रदेशके भेला करके पार्टी पुर्नगठन करले बा । जनमोर्चा केन्द्रीय सदस्य तथा प्रदेश इन्चार्ज लालबहादुर जाग्रीके वडका पहुनामे भेला करके पार्टी पुर्नगठन करल हो ।

यी आघे नन्दराम भट्ट नेतृत्वके जनमोर्चा प्रदेश कमिटि रहे । राष्ट्रिय जनमोर्चा कञ्चनपुरके पूर्व अध्यक्ष एव केन्द्रीय सल्लाहकार लोकेन्द्र लम्सालके नेतृत्वमे प्रदेश कमिटि पुर्नगठन हुइल बा ।

गैल चैत बुटबलमे सम्पन्न हुइल पार्टीके महाधिवेशनसे प्रदेश कमिटिहे कार्यकारी बनैना ओ पार्टी पूर्नगठन करके जनताके जनजिविका एव राष्ट्रियताके सवालमे मुद्दा उठान कैना पार्टीसे स्प्रीट आघे सरलेसेफे प्रदेश नेतृत्वसे कुछ करे नइसेकल कहटी प्रदेशमे भेला करके पार्टी पुर्नगठन करल नवचयन अध्यक्ष लम्साल बटैलै ।

अध्यक्ष लोकेन्द्र लम्साल पार्टी पुरे दक्षिणपन्थीओर धकेल्टी रहल बेला अपनेहुक्रे सुदूरपश्चिम प्रदेशसे विद्रोह करल बटैलै । ‘हम्रे यी विद्रोह कौनो समानान्तर कमिटि विस्तार करल नइहुई, ‘नव गठित जनमोर्चा सुप प्रदेशके अध्यक्ष लम्साल कहलै, ‘पार्टीके विधान एव बुटबल सम्मेलनसे आघे सारल नीति, सिद्धान्त अनुरुप सुप प्रदेशके पार्टी पूर्नगठन हुइल हो ।’

पुर्नगठन करल कमिटिमे उपाध्यक्षमे तिलक परिवार, सचिव लछिराम आर्चाय, सह सचिव हुकुम सिह साउद, कोषाध्यक्ष केशवसिह योगी, सचिवालय सदस्य महेश जोशी, गोविन्द विक, धनबहादुर बोहरा चयन हुइल बटै ।

प्रदेश सदस्य प्रकास ऐर, नरेश झुवाल, कृष्ण विक, विक्रम विश्वकर्मा, गोरख बहादुर विक, निरु विक, सुरेश चौधरी, हरि शर्मा, हरि प्रशाद भट्टराई, मान बहादुर खडका, रमेश नागरी, डब्बल तिरुवा , उमेश कडेल, हेम विक्रम चन्द, लाल बहादुर जाग्री चयन हुइल बटै । कलेसे सल्लाहकारमे जयराज भण्डारी, शंकर सोव, सिद्धसिह, विक, कृष्ण पण्डित, उद्धव ऐर सहित ५७ सदस्यीय प्रदेश परिषद कमिटि गठन करल बा । ओस्टे सुप प्रदेशके सक्कु जिल्लाके पुर्नगठन करल बा ।

कञ्चनपुरके जनमोर्चा अध्यक्ष रामबहादुर कार्कीहे अनुशासनके कार्बाही करले बा । जनमोर्चा प्रदेशके सदस्य समेत रहल कार्कीके ठाँउमे जनमोर्चाके दुसर नेता गोविन्द विकहे संयोजक तोकल बा ।

यी बार प्रदेश कमिटिमे युवा पुस्ता सहित प्रदेशके ९ जिल्लाके ९० प्रतिशत अगुवा नेता कार्यकर्ताहुकनके उपस्थितिमे भेला सम्मपन्न करल मोर्चा जनैले बा ।

पार्टी पूर्नगठनपाछे कैलालीमे आयोजित पत्रकार सम्मेलनमे अखिल छैठौँके केन्द्रीय महासचिव तथा नव गठित जनमोर्चा सुप प्रदेशके सचिवालय सदस्य महेशराज जोशी मुल पार्टी यिहे रहल बटैटी पार्टीका सबै जनबर्गिय संघ संगठन लम्साल नेतृत्वके पार्टीमे गोलबन्द हुइल बटैलै ।

कार्यक्रममे राष्ट्रिय जनमोर्चा केन्द्रीय सदस्य तथा सुप प्रदेश इन्चार्ज लाल बहादुर जाग्री पार्टी पुर्नगठन हुइलसंगे प्रदेशके सक्कु जिल्ला, पालिका, वडा तथा गाँउबस्तीसम पुग्न व्यक्त करले रहिट ।