कञ्चनपुरके ‘भाइरल रोड’मे जैना प्रतिबन्ध

कञ्चनपुर, ९ भदौ । कञ्चनपुरके भीमदत्त नगरपालिका–१२, ओदालीस्थित महाकाली ६ लेनके सडकमे जैना प्रतिबन्ध लगाइल बा ।

जिल्ला प्रशासन कार्यालय कञ्चनपुर महाकाली नदीमे निर्माणाधीन चार लेनके पक्की पुलके पहुँच मार्गमे जैना प्रतिबन्ध लगाइल हो ।

निर्माणाधीन सडकमे भीडभाड हुइ लागलपाछे कोरोनाके जोखिम बह्रल ओरसे अँट्वारसे सडकमे जान प्रतिबन्ध लगाइल प्रमुख जिल्ला अधिकारी रामप्रसाद पाण्डे बटैलैं ।

‘भीडभाडसे कोरोनाके जोखिम फेन बह्रल ओ सुरक्षाके दृष्टिसे फेन संवेदनशील हुइल ओरसे घुमघामके लाग सडकमे जैना निषेध करल बा,’ उहाँ कलैं, ‘निर्माण कम्पनी कामदार ओ उहाँक स्थानीयहे नेंगेघुमे पैना मने सडकमे बैठ्ना करके जाइ नैपैहि ।’

सामाजिक सञ्जालमे भाइरल हुइलपाछे सडकमे दैनिक ४/५ हजार मनै सेल्फी, भिडिओ खिचे, टिकटक बनाइक लाग पुगिट । अब्बे यी सडक ‘भाइरल रोड’से कहिके चर्चित बनल बा ।