अपनेक मास्क खोई ? अभियानहे युवा क्लवके साथ

पहुरा समारचादाता
अत्तरिया, १० भदौ । नेपाल प्रहरीसे देशभर अपनेक मास्क खोई अभियान सञ्चालन करले बा । कोरोना संक्रमणसे बचक लाग मास्क अनिवार्य कैना प्रहरीसे मास्क अभियान सरु करल हो ।

प्रहरीके अभियानमे अत्तरिया युवा क्लव फेन साथ डेले बा । क्लवके अध्यक्ष दिपिन साँउदके अनुसार प्रहरीके समन्वयमे अत्तरिया बजारमे मास्क नै लगाके नेंगुइया घुमुइयाहे निशुल्क मास्क वितरण करल हो । प्रहरी ओ क्लवके पदाधिकारी मिलके बटुवा, व्यापारी ओ यात्रुहे मास्क वितरण करल हो । ‘कोरोनाके जोखिम आभिन फेन हटे सेकल नैहो’, क्लवके अध्यक्ष साँउद कहलै ।

मास्क वितरण कार्यक्रममे क्लवके पदाधिकारी, क्षेत्रिय ट्राफिक कार्यालय अत्तरियाके इन्सपेक्टर गेणश राज उप्रेति, इलाका प्रहरी कार्यालय अत्तरियाके प्रमुख एवं डिएस प्रेम शाही लगायत सुरक्षाकर्मीहुक्रनके सहभागिता रहल रहे । ३५ सय ढिउर मास्क वितरण करल क्लव जनैले बा ।