कटैनी लडियाके बाढसे छटकपुर बसन्ता गाउँ जलमग्न

पहुरा समाचारदाता
धनगढी, ११ भदौ । बिफेक रात अविरल बर्सापाछे आइल बाढसे कैलालीके टमान ठाउँ डुबानमे परल बा । मोहना, काढा, कान्द्रा लगायत लडियामे आइल बाढसे जिल्लाके टमान ठाउँ डुबानमे परल हो ।

ओस्टके कटैनी लडियामे आइल बाढसे कैलारी गाउँपालिका वडा नम्बर ७ छटकपुर बसन्ता गाउँ जलमग्न हुइल बा । बाढसे ३० से ढिउर घरमे पानी पैँठल स्थानीय जीया चौधरी जानकारी डेलै ।

ओस्टके उहे लडियाके बाढसे वडा नम्बर ७ अन्र्तगत बर्का बसन्ता, भुँइयाँफाँटा ओ रामपुर गाउँके स्थानीयहुक्रनके घरमे पानी पैँठल जनाइल बा ।

बाढसे जोशीपुर गाउँपालिका वडा नम्बर ३ के फाडिया, भिटरिया गाउँ फेन डुबानमे परल जोशीपुरके पत्रकार सुधराम दहित बटैलै । ओस्टके जानकी गाउँपालिकाके वडा नम्बर ४ ओ ७ मे फेन बाढ पैँठल जनाइल बा । बाढसे गाउँपालिकाके वडा नम्बर ४ के ० घर ओ वडा नम्बर ७ के ५ घर डुबानमे परल पत्रकार नेत्रप्रसाद न्योपाने बटैलै ।

यहोर कैलालीके गोदावरी नगरपालिका वडा नम्बर ४ स्थित गोदावरी लडियामे आइल बाढसे एक घर पुहैले बा कलेसे बाढसे छेँक परल २ जनहनके मध्यरात उद्धार करल बा ।

जिल्ला प्रशासन कार्यालय कैैलालीका अनुसार गोदावरी नगरपालिका–४ स्थित गोदावरी लडियामे बाढ आके काठे पुल, दुर्गा मन्दिरस्थित ४२ वर्षीय गणेशदत्त पाण्डेके इँटासे बनल टिनसे छाइल १ कोठे किराना पसल ओ काठसे बनल टिनसे छाइल प्रतिक्षालय पुहाइल जनाइल बा ।

शिवगंगा लडिया ओ झिलखोला बीच भागमे छेँक परल २ जनहनके उद्धार करल जिल्ला प्रशासन कार्यालय कैलालीके सूचना अधिकारी शिवराज जोशी बटैलै । गौरीगंगा नगरपालिका–३ कुचैनी बैठुइया राजाराम सापकोटा ओ ओहकान बहिनीया आरती सापकोटाके उद्धार रहे ।

घाँस काटे गैल बेला बाढसे छेँक परल उहाँहुक्रनके मध्यरात नेपाली सेना, नेपाल प्रहरी र सशस्त्र प्रहरी बलके टोलीसे उद्धार करल रहे ।