थारु भासा, संस्कृटिके डस्टावेजिकरणमे खै बल्गर खम्हा ?

कौनो जबाना रह, जब आपन भासा बोल्लसे वा भासिक क्रान्टि कर्लसे जेल जाए पर्ना । जब जब मै थारु भासाके थारु साहित्यक जुट्यालाम सहभागि हुइठुँ, टब टब लागट महिन आजसे लगभग कैयौँ बरस आघ कसिन रहट म्वार भासक बैठावन ? इ चिज ट आभिन खोज्ना बाँकि जो बा ।

२०७७ सालमे सुर्खेतम हुइल पाचौँ थारु साहित्यक सम्मेलनम हरेक बरसके जस्ट इ बरस फे मेरमेरिक फरक–फरक बिसयम बाटचिट हुइल । गैलक बरस कोरोना के कारनले ख्याल बगालसे भच्र्युल थारु साहित्यिक महोत्सव हुइल रह । इहिँसे आघक बरस २०७५ सालमा रुपन्देहीक मुर्गिया सैनामैनाम थारु साहित्यक सम्मेलन सम्पन्न हुइल रह । मुर्गियाम हुइल कार्यक्रमम फे मानक भासा सम्बन्धि बहस हुइल रह । इ साल सुर्खेत म फे मानक भासा सम्बन्धि, वस्ट कैक थारु गीत संगीतके डगर, थारु विसय बस्तुम नेपाली भासम कलम चलैना आख्यानकारनके बुझाइ, थारु लोकसंस्कृति ओ डस्टावेजिकरण लगायट बिसयम प्यानल छलफल हुइल रह ।

मै थारु साहित्यक जुट्यालाम डुइचो आपन सहभागिटा जना रख्नु । सुर्खेतम कार्यक्रम मनैटि रहल ब्याला घरि–घरि इ मन ढ्यार डुस फे नाहि जम्मा पचास बरस आघ जाए, सोँचु मनै आपन भासा बोल्क ओ आपन भासाम साहित्य, लेख प्रस्टुट कर्लक कारणले कसिक जेल पठाइ स्याकट कैक खोब मनम बाट ख्यालल् । पैलक अवस्था न कर्रा रह ।

सुर्खेत के कार्यक्रमम थारु लोकसंस्कृति ओ डस्टावेजिकरण विसयम सहजकर्टाके जिम्मेवारी पाइल रहनु । इ बहसम थारु कल्याणकारिणी सभा दाङके अध्यक्ष भुवन चौधरी, गोचाली पत्रिकाके संस्थापक भग्वतीप्रसाद चौधरी से बाट कर पैना मौका जुरल रह । यह प्रसंगम आज बटाइ जाइटुँ मै थारु लोकसंस्कृति के बारेम ओ अवस्ठा कसिन बाटस ? का खर पुस्टा हस्टान्टरण कर्नामा अत्रा कर्रा बा कना बाट म जाइ चहम ।

का हो थारु लोकसंस्कृति ?

हमार थारुनके पुरान जत्रा फे गीतबास बा । भासा, थारुनके रहनसहन, चालचलन, लवाइ खवाइ, बैठाइ उठाइ, मन्त्रटन्त्र वा कहि थारुनके जनजिवनसे सम्बन्ढिट जट्रा फे चिज हम्र बेल्सठि, इ सक्कु चिज थारु लोकसंस्कृति भिट्टर परट । थारु कला संस्कृटिम और जहनके टुलनम ढ्यार जो ढनि बाट । कठ झे जौन मनै ढ्यार ढनि रठ ट मट्टा जैठ हुँ । थारुनके हालट आब ओस्ट बा । थारु आब आपन डग्रा बिस्सा गिल बाट ।

आप कहि कट्रा ढ्यार चिज बाट हम्र आबसम्म कसिक बचैल बाटी ?आप बाट करि डस्तावेजिकरणके ।

डस्टावेजिकरण कलसे हम्र का बुझ्ठि ?

कौनो फे चिजके लिखिटम जानकारि संकलन कैक लिखल चिज, जौन पाछ जाक कौन प्रमाणके रुपम प्रयोगम आन सेक्जाइट । लिर्वाससे कहबेर काजगम लिख्क, भिडियो खिँच्क, बाट रेकर्ड कैक ढर्ना हँ हम्र डस्टावेजिकरण कैक बुझ्ठी । का लिख्ना, रेकर्ड कर्ना इह किल डस्टावेजिकरण हो ट ?
जब विश्वम छापा माढ्यमके स्थापना हुइल रह, उ समय रह १४ औँ सताब्दीके मढ्य होँर । इ समयम बल्ल लिखल चिजहँ मजासे छाप्क ढरक लाक छापा मेसिनके आविस्कार हुइल । उह व्याला हमार थारुनके डस्टावेजिकरण कसिक ह्वाय ट ? कबु इ बाट म हम्र गैल बाटि ? सोँचि, मनन करि, हेरि कहाँ पुग्ठि ?

आप बाट करि हमार थारुनम डस्टावेजिकरण कसिक कैजाइट कैक । बर्सौ पहिलसे थारुहुँक्र आपन भासा बोल्टि आइल बाट, गिट गैटि आइट, बाजा बजैटि आइट, लुग्गा कसिक सिना कैक सिटि लगाइट । कौन समय मछि मर्ना, कौन समयम बन्वम सिकार ख्याल जैना, कौन रोगम कौन बिर्वा लगैना हो । सँप्वा कट्लसे कौन रुख्वक बौँरक पट्या लगैना हो ? ढक्या, भौँका, पैन कसिक बिन्ना हो ? डेहरि, चुल्हा कसिक बनैना हो ? कैक सक्कु चिज अलिखिट टरिकासे डस्टावेजिकरण हुइटह हमार सिपम, हमार गैना कलाम । मने ढिरे ढिरे इ इटिहास आब हेरैना अवस्ठम आ पुगल ।

थारु पुर्खन आपन लोक संस्कृतिके डस्टावेजिकरण करक लाक कलम कापि, सिडि टिभि रेडियो कुछु फेन नै चहलिन । कसिक अत्रा ढ््यार बरससे इ चिज बचैटि यहाँ सम अन्ल बाट ट ? इ स्वाँच पर्ना ओ गम्भिर बिसय बनल बा ।

कसिक पुस्टा हस्टान्टरण हुइ ट ?

हम्र आपन चिजसे डुर भग्टि जाइटि । हमार मैगर चिज हमनसे डुर गैलक हमन पटा नै चलठो । हम्र आपन चिज हँ मैया कर सिखि । जौन डिन इ चिज हँ आपन जिन्गिके अहम् हिस्सा स्वच लग्बि, उ डिनसे आपन चिजके बचावट हुइ लागि ।

सबसे भारि बाट हम्र आपन लर्कन आपन भासा लगाम, गिटबास सिखाइ जो नै चहठि । नेपाली भासा, अंग्रेजी भासा ब्वाल जनहिँ ट ढ्यार प्रगटि हुइ, ढ्यार जन्नाहाँ बनहिँ कना जौन डाइ बाबन्के बुझाइ बाटन । यडि इह बुझाइ पला रहि कलसे ढ्यार कर्रा परि । इ चिज हँ हम्र गम्हिर होक सोँचि । आपन चिज आपन बनैँना कौन बेर नै हो तर इ चिज खराब बा कैक सोच्बि कलसे जरुर आपन चिज आपनसे डुर बनैना कौन बेर नै लागि ।

देश विदेशके मनै हमार चिज हँ मन परैठ, वाकर बारेम बुझक् लाक अइठ कलसे सोचिँ हम्र फे इ चिजसे हमार पहिचान किल नै होक जिनगि फे ज्वारल बा । हम्र आपन लर्कन आपन चिनारी का हो ? कसिक इ चिज हमार ठे रहि ट हम्र हम्र जो रबि कैक बुझाइ परल । लौव पुस्टा आधुनिक समय हँ पछ्यरक आघ बह्रटि कठ टर एक चो पाछ घुम क हेरि ट हमार समाज हमार मनै, हमार पुर्ख हुँक्र कट्रा आधुनिक रहल कैक । जौन चिज जस्ट गिटबास ह्वाय वा कहि हमन संग जोरगिल चिज कौनो फेन चिज कौनो फे कागजम नाहिँ, मुखग्रे कन्ठ कैक पुस्टा हस्टान्टरण कैक कसिक संरक्षण कर्ल ओ यहाँसम पुगैल । एक चो सोँचि ट ।

इ हिसाबले ट हम्र हमार पुर्खा पो आढुनिकटाके डस्टावेजिकरण के हिसाब म आघ रहल कैक कह सेक्जाइट । जौन चिज हम्र छाटि फुलाक कह सेक्ठि कि हम्र हुइटि आढुनिकटाके बल्गर खम्हा । टर दुःख के बाट का बा कलसे हम्र हमार चिज चिन नै स्यकल हुइ ।

विश्वके आदिवासी जनजाति हुँकनके इतिहास हेर्ना हो कलसे जहाँ फे हुँकन मेटैना कोसिस कर्गिल डेखा परट । इ हिसाबले हम्र का स्वाँच सेक्जाइ कलसे मनैन के अस्तित्व पहिचान वाकर चिना टब सम रहट, जब सम उ आपन संस्कार परम्परा संस्कृतिसे, आपन भासासे ज्वारल रहट । जौन डिन इ चिजसे डुर हुइहिं, ओह डिन मनै आपन अस्तित्व आपन पहिचान ओरा डरहिं कैक इ चिजसे राज्यसत्ता जानाजान अनडेखा करट ।

भासा कना चिज मनैन् के पहिचानसे नस्स लग्घुसे जोर्गिल चिज हो । जब मनैन् के भासा ओराइ, ओह डिन मनैन् के पहिचान फेन ओराजाइ । इ डेस के इतिहास हेर्बो कलसे फे एकल भासा नीति जो लागु हुइल बा । आब बहुल भासा नीति ट कैगिल बा टर आभिन सम्म इ लागु हुइ नै स्याकल हो ।

२०२८ सालम जब थारु भासाके पहिलो पत्रिका गोचाली पत्रिका के संस्थापक सगुनलाल चौधरी हँ पक्रलिन, पत्रिका प्रकासन कर्लक ओ इ पत्रिकाम क्रान्टिकारि गिट कविटा लिख्लक निहुँम । छयालिस के आन्डोलनके पाछ सरकार भासिक सवालम कुछ लरम हुइलेसे फेन मेरमेरिक जनजातिन खास अनुभुटि नै हुइल । बेनसे २०५२ से २०६२ सालसम चलल् जनयुद्धमे सब थारुन् माओवादी डेख्ना सरकारि रवैयाके मारमे थारु परलाँ । उहे क्रममे गोचाली आन्डोलनके अग्वाइ कर्लक निहुँमे सगुनलाल चौधरी २०५९ पुस १२ गटे पक्रवा पैलाँ । हुँकार आझसम फेन अटा पटा नै हो । भासिक नरसंहार के इ ज्वलन्ट उडाहरन फे हो । सगुनलाल भासिक सहिड फेन हुइट ।

इ चिजले हम्र का बुझ सेक्जाइट कलसे हमार आपन चिज ढरापम बा । इहि बचैना जिम्मेवारी फे हमार जो हो । याकर डस्टावेजिकरण कागजि रुपम कर्ना टे पर्लि बा, ओकर साठ साठ मुखाग्र ढर सेक्ना क्षमता फेन बनाइ । हेरि इ चिज आजुसे सुरु कर सेक्बि कलसे अइना कैयौं बरस सम हम्र आपन संस्कृटिके डस्टावेजिकरण कैक कसिक संरक्षण कर सेक्जाइट कैक एकठो नमुना बन सेक्बि ।

ओराइबेर का कना चहम कलसे पुस्टा हस्टान्टरण ढ्यार जरुरि बा । कृष्णराज सर्वहारीक अग्वाइम हुइटि रहल थारु साहित्यक सम्मेलन क उड्डेस्य फेन इह हो कि हम्र आपन भासा, संस्कृटि कसिक बजाइ सेक्बि कैक । टर डुःख लग्टिक बाट का हुइल कलसे सुर्खेत के थारु साहित्यक जुट्याला म थारु युवा हुँकन सहभागिटा नस्स कम डेखा परल । जब कि इ कार्यक्रम मार्फट युवा हुँकन आपन भासा आपन संस्कृटि होँर कसिक संलग्न कर सेक्जाइ ?, कसिक लव पुस्टाम इ जागरुकटा लान सेक्जाइ कैक हरेक बरस लौव लौव ठाउँम कार्यक्रम कर्टि आइल बा थारु लेखक संघ । हे, युवा अपन समाजके भासा, संस्कृटि संरक्षणके जागरणके लाग आब ट जागो । जय गुर्वावा ।

लेखिका इण्डिजिनियस टेलिभिजनम थारु भासक् ‘चली गोचाली’ कार्यक्रम चलैठि ।