अध्यक्षतामे फेर लाहुराम चयन
पहुरा समाचारदाता
धनगढी, १३ भदौ । धर्मोदय सभा कैलालीके छैठौ जिल्ला अधिवेशन शनिच्चरके रोज सम्पन्न हुइल बा ।
छैठौ जिल्ला अधिवेशनके उदघाटन कार्यक्रम बौद्धधर्म गुरु बौद्ध लामाके वडका पहुनामे हुइल रहे । कार्यक्रममे उहाँ बुद्ध भगवानसे डेहल पञ्चशिल मन्लेसे विश्वमे शान्ति स्थापना कायम करे सेक्ना बटैलै । उहाँ कहलै, हरेक व्यक्ति रुप्या, धनदौलत, आयस आराम, विलाशिताके पाछे डौरटै, मने अन्तिममे सक्कुहुनहे शान्ति चाहठ ।
कार्यक्रममे धर्मोदय सभाके आजीवन सदस्य दिल बहादुर चौधरी धर्मके विषयमे थारु समुदाय अलमलमे रहल बटैलै । उहाँ कहलै, जनगणना आइटा ओम्ने धर्मफे लिखाई पर्ना रहठ, थारु समुदाय बौद्ध धर्म लिखैना की और धर्म लिखैनामे अलमल परठै, थारु समुदायफे कोई हिन्दु धर्म मानथ, कोई क्रिश्चयन टे कोई और धर्म मन्ठै । बौद्ध धर्म सम्बन्धी प्रचारप्रसार नइहुइल कारण यी धर्म पाछे परल उहाँ बटैलै ।
सभाके आजिवन सदस्य कमल पुनमगर संस्था स्थापना हुइल लम्मा समय हुइलेसेफे स्थापित हुई नइसेकल बटैलै । उहाँ कहलै, बुद्ध एशियाके शान्ति दुत हुइट कहिके चिन्जाइठ मने बुद्ध धर्म ओझेलमे परटी गैल बटैलै ।
सभाके सल्लाहकार फोनीराम चौधरी बुद्ध थारुनके सन्तान हुइल ओरसे थारु समुदाय बौद्ध धर्मलम्बी रहल तर्क डेलै । कार्यक्रम धर्मोदय सभा कैलालीके अध्यक्ष लाहुराम चौधरीके अध्यक्षतामे हुइल रहे । कलेसे संचालन सभाके निवर्तमान उपाध्यक्ष दलबहादुर घर्ती मगर ओ स्वागत मन्तव्य नेत्र तमाङ करले रहिट ।
सभाके अध्यक्षमे फेरसे लाहुराम चौधरी चयन हुइल बटै । ओस्टेक उपाध्यक्षमे कमलपुन मगर, सचिवमे सरिता चौधरी, सहसचिवमे पुष्प पन्त, कोषाध्यक्षमे आराधना तुलाधर लगायत ११ सदस्य लौवा कार्यसमिति चयन हुइल बा ।
ओस्टेके, सहकोषाध्यक्षमे बासमति चौधरी, सदस्यमे चन्द्रा तमाङ, जितेन्द्र तुलाधर, गोकर्ण राना, धर्मराज अवस्थी ओ बेलमति चौधरी रहल बटैं ।
