बाढ घटलपाछे जनजीवन सहज
पहुरा समाचारदाता
टीकापुर, १३ भदौ । कैलालीके दक्षिण पूर्वी भागमे रहल भजनी ओ टीकापुर नगरपालिका तथा जानकी गाउँपालिकामे बाढसे डुबानमे परल स्थानीय समस्यामे परल बाटै । कतिपयके घरमे पानी फेन पैँठके हिलाकिचा होके बैठ्ना अवस्था नैहोके सडकमे बैठल ओ कुछ भर घर गैल भजनीके जनप्रतिनीधि बटैले बाटै ।
भजनी–३ के वडाध्यक्ष विक्रम चौधरी शुकके तुलनामे लडियामे पानी घटल ओरसे कुछ सहज हुइल बटैलै । उहाँ कहलै, ‘शनिच्चरके पानी नैपरल । लडियामे पानी फेन कुछ कम हुइल बा । पानी नैपरी कलेसे जनजीवन सामान्य बन्टी जाइ ।’ पानी घटलपाछे क्षतिके अवलोकन ओ प्रभावितके तथ्यांक संकलनके लाग अपनेहुक्रे खटल उहाँ बटैलै ।
काढा, पथरैया, मोहना ओ कान्द्रा लडियाके बाढसे शुकके भजनी नगरपालिकाके करिब एक हजार घर डुबानमे परल रहे । ओस्टके कर्णालीसे कटान करल टीकापुर नगरपालिकाके शाहीपुरमे जोखिम कम हुइल बा । कटानके उच्च जोखिम क्षेत्रके बासिन्दा जैविक तटबन्धके साथे रानी जमरा कुलरिया सिँचाइ आयोजनासे लडिया कटान नियन्त्रणके लाग ढुंगा गिराइलपाछे गाउँ पैँठ्ना जोखिम कम हुइल हो ।
जोखिममे रहल टीकापुरके दक्षिणी भागके करिब २ सय जाने शनिच्चरके कटान रोकथामके लाग तटबन्ध करल टीकापुर नगरपालिका–८ के जीतराम चौधरी बटैलै ।
