पत्रकार जेपी जोशीके छाइहे एक्सीस निःशुल्क पह्रैना

पहुरा समाचारदाता
धनगढी, १३ भदौ । कैलालीके दिवंगत पत्रकार जेपी जोशीके छाइ पुजाहे धनगढीके एक्सिस विद्याश्रम निःशुल्क पह्रैना हुइल बा । पत्रकार महासंघसे समन्यव करलपाछे एक्सिससे पुजाहे निःशुल्क पह्रैना निर्णय करल हो ।

इहे बरस एसईई उत्तिर्ण करल पुजा एक्सिसमे कानुन विषय पह्रना बटैले बाटी । ‘मोर जस्टे पीडित औरे जनहनहे हुइ नपरे मै कना चाहटु,’ उहाँ कहली, ‘बाबाहे फेन न्याय डेहुवाइ सेकम की कना आश बा । कानुन पह्रके न्यायके लाग लरम ।’

पत्रकार महासंघके केन्द्रीय सदस्य भरत शाह एसईईपाछे पुजा कानुन पह्रना चाहना राखलपाछे एक्सिससे समन्वय करल बटैलै । एक्सिसके प्रिन्सिपल अनिता पन्त पु्जाहे निःशुल्क पह्रैना बटैली । उहाँ कहली, ‘पुजासे उत्कृष्ट नतिजाके अपेक्षा करले बाटी ।’

तत्कालीन समयमे जनादेश साप्ताहिक ओ जनदिशा दैनिकमे कार्यरत जोशी २०६५ असोज २२ गते अत्तरिया बजारसे बेपत्ता हुइल रहिट । बेपत्ता हुइल दुई महिनापाछे ०६५ मंसिर १३ गते घर लग्गे चौकीडाँडा महिला सामुदायिक वन उपभोक्ता समितिके जंगलमे कंकाल ओ हड्डी भेटल रहे । कंकालसंगे मोबाइल तथा परिचयपत्र भेटलपाछे ओहकान पहिचान हुइल रहे ।

घटनाके छानबिन कैना तत्कालीन सरकारसे अधिवक्ता उमेश गौतमके संयोजकत्वमे जाँचबुझ समिति गठन करल रहे । समितिसे पत्रकार जोशीके हत्या हुइल स्वीकार करलेसे फेन अब्बेसम दोषीहे कानुनी दायरामे लाने नैसेकल हो । समितिसे २०६६ सालमे अध्ययन प्रतिवेदन सरकारहे बुझैलेसे फेन हालसम औपचारिक रूपमे सार्वजनिक फेन करल नैहो ।