प्लेयर अफ द म्याच गुरुजी सटिङ्ग एन्ड सुटिङसे प्रायोजन
पहुरा समाचारदाता
धनगढी, १४ भदौ । क्रिकेटके सहरके रूपमे परिचित धनगढीमे सञ्चालन हुइटि रहल विद्यालयस्तरीय यु–१९ राष्ट्रिय क्रिकेट प्रतियोगिता लिटल फ्लावर प्रिमियर लिगके छैटौँ संस्करण घोषणा हुइल बा ।
आयोजक लिटल फ्लावर स्पोस्टर्स एन्ड इभेन्ट्स अँट्वारके रोज धनगढीमे पत्रकारसम्मेलनके आयोजना करटि प्रतियोगिताके आगामी संस्करण धनगढीमे माघ अन्तिम सातासे सञ्चालन करना घोषण करल हो ।
लिटल फ्लावर स्पोस्टर्स एन्ड इभेन्ट्सके अध्यक्ष रामचन्द्र शाही कोरोना महामारीसे विश्व प्रभावित बनलेसे फेन विद्यालयस्तरके खेलाडीके खेल क्षमता अभिवृद्धिके लाग प्रतियोगिताके आगामी संस्करणहे निरन्तरता डेहल बटैंलैं ।
‘ग्रास रुटके क्रिकेटहे चलायमान बनैना जरुरी रहल ओरसे फेन हम्रे अइना संस्करणहे निरन्तरता डेहेपरना बाध्यताहे स्वीकार करलि,’ उहाँ कलैं, ‘कोरोनासे आर्थिक क्षेत्र नैमजासे प्रभावित बनल टे पलि बा, टबफेन हम्रे सुरु करल अभियानहे सेकटसम ओझेलमे परे नैडेना कहिके यिहिनहे निरन्तरता डेना प्रयास करल हो ।’
प्रतियोगितामे यी संस्करणमे देशभरके १० विद्यालयस्तरीय टिमके सहभागिता रना शाही बटैलैं । लिग कम नक आउट फरम्याटमे खेलैना प्रतियोगितामे १० टिमहे २ पोलमे विभाजन करके प्रत्येक टिम लिग चरणके ४ खेल खेले पैहि । प्रत्येक टिममे १९ वर्ष टरेक ४ जाने खेलाडी ढरे पैहि ।
प्रतियोगिताके उत्कृष्ट खेलाडीहे २० हजार, उत्कृष्ट बलरहे १० हजार, उत्कृष्ट ब्याट्सम्यानहे १० हजार ओ उदयमान खेलाडीहे १० हजार प्रदान करना प्रतियोगिताके संयोजक भूपिसिंह धामी बटैलैं ।
प्रतियोगिताके प्रत्येक खेलके प्लेयर अफ द म्याचके पुरस्कार राशि धनगढीमे रहल गुरुजी सटिङ्ग एन्ड सुटिङ प्रायोजन करले बा । अँट्वारके रोज आयोजित पत्रकार सम्मेलनमे लिटल फ्लावर स्पोस्टर्स एन्ड इभेन्ट्सके अध्यक्ष शाही ओ गुरुजी सटिङ्ग एन्ड सुटिङके सञ्चालन सतिश जोशी उ घोषणामे सम्झौता करले बटैं । महामारीसे व्यवसाय कमजोर रलेसे फेन सामाजिक क्षेत्रमे सेकटसम योगदान पुगैना उद्देश्यसे प्रतियोगितामे प्लेयर अफ द म्याचके पुरस्कार राशि प्रायोजन करल जोशी बटैलैं ।
प्रतियोगिताके एजुकेसन पार्टनरके रूपमे कैलालीके लम्कीमे रहल कैलाली गुरुकुल इङ्लिस मिडियम हाई स्कुल रहल बा कलेसे केक पार्टनरके रूपमे आँगन केक्स धनगढी रहल बा ।
