कटैनी लडियाक् बाढसे सडक अवरुद्ध
पहुरा समाचारदाता
धनगढी, १५ भदौ । कटैनी लडियामे आइल बाढसे कैलारी गाउँपालिका वडा नम्बर ७ बर्का बसन्ता ओ छटकपुर बसन्ता बिचके सडक खण्ड अवरुद्ध हुइल बा ।
मंगर सकारे आइल बाढसे अवरुद्ध हुइल सडकके कारण हुलाकी सडक होके आउजाउ करुइया यात्रु बिच डगरासे घुमेपरल स्थानीय बटैले बाटै । सडक अवरुद्धसे आपन छाइनहे डेहे आइल अग्रासन फेन बिच डगरामे छोरके लौटे परल बटैले बाटै ।
कैलारी गाउँपालिका वार्ड नम्बर ७ छटकपुर बसन्ताके विकास रत्गैया अग्रासन लेहे अपनहे बर्का बसन्ता पुगल बटैलै । आफन्त बिच डगरासे घुमके गैलपाछे उहाँ अग्रासन लेहे अपनहे पुगल बटैलै ।
लडियाके बाढ वडा नम्बर ७ अन्तर्गतके छटकपुर बसन्ता, बर्का बसन्ता, भुँइयाफाँटा गाउँमे पैँठ्ना करल बा । चुरेओर हल्का वर्षा हुइटी किल लडियामे बाढ अइना करल स्थानीय बटैले बाटै ।
लडियामे झारपात, माटी बालुसे भँठके लडियाके सतह भँठल ओरसे हल्का आइल बाढसे फेन गाउँमे पैँठ्ना करल भुँइयाँफाटा गाउँके डण्डीराम चौधरी बटैलै । उहाँ बाढ नियन्त्रण करक लाग कटैनीके सरसफाई सहित तटबन्ध ओ ड्याम फेन निर्माण करे पर्ना बटैलै ।
