थप १५२३ कोरोना संक्रमित, २० के मृत्यु
काठमाडौं, १५ भदौ । बिटल २४ घण्टामे १ हजार ५ सय २३ जहनमे कोरोना भाइरस संक्रमण डेखाइल बा । स्वास्थ्य तथा जनसंख्या मन्त्रालयके अनुसार ९ हजार १ सय १७ पीसीआर परीक्षणमे मंगरके रोज थप १ हजार ५ सय २३ जहनमे संक्रमण पुष्टि हुइल हो । यीसँगे नेपालमे कोरोना संक्रमण हुइनाके संख्या ७ लाख ६२ हजार ६ सय ४७ पुगल स्वास्थ्य तथा जनसंख्या मन्त्रालय जनैले बा ।
अस्टेक, एन्टिजेन विधिसे करल ३ हजार १ सय ५ परीक्षणसे १ सय ४१ जहनमे पोजिटिभ डेखाइल बा । २४ घण्टामे पीसीआर ओ एन्टिजेन विधिसे करल १२ हजार २ सय २२ परीक्षणमे १ हजार ६ सय ६४ जहनमे संक्रमण पुष्टि हुइल मन्त्रालय जनैले बा ।
बिटल २४ घण्टामे थप १ हजार ७ सय ८६ जाने संक्रमणमुक्त हुइल बटैं । हालसम नेपालमे कोरोनामुक्त हुइनाके संख्या ७ लाख १६ हजार ३ सय ६ बा ।
नेपालमे कोरोना संक्रमणसे थप २० जहनके मृत्यु हुइल बा । यीसँगे नेपालमे कोरोनासे मृत्यु हुइनाके संख्या १० हजार ७ सय ५० पुगल बा ।
नेपालमे कोरोनाके सक्रिय संक्रमितके संख्या ३५ हजार ५ सय ९१ रहल बा ।
