सुदूरपश्चिमके १० सांसद समाजवादीमे सनाखत करलैं
पहुरा समाचारदाता
धनगढी, १५ भदौ । सुदूरपश्चिम प्रदेशमे एमाले परित्याग करके नेकपा (एकीकृत समाजवादी) मे लागल सुदूरपश्चिमके सांसदहुक्रे सनाखत करले बटैं ।
नेकपा एमाले छोरके एकीकृत समाजवादी रोज्न इच्छुक प्रदेश सांसद मंगरके रोज प्रदेश निर्वाचन कार्यालय धनगढीमे पुगके सनाखत करल हुइँटैं ।
समामुख बाहेक २४ जाने सांसद रहल नेकपा एमाले सुदूरपश्चिममे १० जाने माधवकुमार नेपालसे खोलल नयाँ पार्टी नेकपा (एकीकृत समाजवादी) पक्षमे सनाखत करले बटैं । समाजवादी दलमे सनाखत करइयामे प्रदेशके आन्तरिक मामिला तथा कानुन मन्त्री समेत रहल पूर्ण जोशी, सामाजिक विकास मन्त्री लालबहादुर खड्का, पूर्वमन्त्री माया भट्ट, राज्यमन्त्री चुनकुमारी चौधरी, मनाकुमारी साउँद, प्रमुख सचेतक दुर्गाकुमारी कामी रहल बटैं ।
अस्टेक, प्रदेशसभा सदस्य कुलवीर चौधरी, अमरबहादुर साउँद, बलबहदुर सोडारी ओ सुशीला बुढाथोकी फेन नयाँ खोलल दल नेकपा एकीकृत समाजावदीके पक्षमे सनाखत करले बटैं । प्रदेशके पूर्वाधार मन्त्री समेत रहल दीर्घ सोडारी, सांसद तारालामा तामाङ ओ अर्चना गहतराज फेन समाजवादीमे रहल जनैले बा । उहाँहुक्रे बुधके रोज किल सनाखत करना जनैले बा ।
विगतमे माधव समूहमे रहल संसदीय दलके नेता प्रकाशबहादुर शाह, पूर्वमन्त्री कृष्णराज सुवेदी, पूर्वराज्यमन्त्री प्रकाश रावल ओ सांसद हर्कबहादुर कुँवर भर एमालेमे रहल बटैं । एमाले उपाध्याक्ष भीम रावल नयाँ पार्टीहे साथ नैडेहलपाछे उहाँहुक्रे फेन माधवके साथ छोरना चर्चा बा ।
विगतसे पूर्वमन्त्री पठानसिंह बोहरा, रतना थापा, ग्याल्बुसिंह बोहरा, माया तामाङ बोहरा, लीलाधर भट्ट, नेपालु चौधरी ओ बलदेव रेग्मी ओली समूहमे रहे ।
नेकपा एकीकृत समाजवादीके केन्द्रीय सदस्यसमेत रहल आन्तरिक मामिला तथा कानुनमन्त्री पूर्णा जोशी १४ जाने सांसद समाजवादीमे रहल बटैलि, ‘निर्वाचन आयोग २२ गतेसमके समय डेले बा । १० जाने आज समाजदावीमे सनाखत करले बटैं । अभिन थपहि ।’
