डीसीसीएमसीके समन्वयमे उपत्यकामे विद्यालय खोले पैना

काठमाडौं, १६ भदौ । काठमाडौं उपत्यकाके तीन जिल्लामे स्थानीय तह जिल्ला कोभिड–१९ संकट व्यवस्थापन केन्द्र(डीसीसीएमसी)सँग समन्वय करके विद्यालय सञ्चालन करे पैना हुइल बटैं ।
बुधके रोज काठमाडौं, ललितपुर ओ भक्तपुरके प्रमुख जिल्ला अधिकारीबीचके बैठकसे स्मार्ट लकडाउनके मापदण्डमे रहिके विद्यालय सञ्चालन करे पैना निर्णय करल हो ।
ललितपुरके प्रमुख जिल्ला अधिकारी ढुण्डीप्रसाद निरौला जनस्वास्थ्यके मापदण्ड अपनाके सिनेमा घर, जिमखानालगायत मनोरञ्जन क्षेत्रहे फेन सञ्चालन करे डेना बटैलैं । उहाँक अनुसार यी निर्णय भदौ १७ गतेसे लागू हुइ ।
काठमाडौं उपत्यकाके तीनु जिल्ला प्रशासन कार्यालय कोभिड–१९ महामारीके रोकथाम तथा नियन्त्रणके लाग निषेधाज्ञा भदौ मसान्तसम कायम ढरना निर्णय करले बा । जिल्ला प्रशासन कार्यालय निषेधाज्ञा कायमे रलेसे फेन ओकर कुछ प्रवाधानमे भर फेरबदल करले बा ।
प्रशासन कार्यालय यीआघे टमान चो म्याद थप करटि भदौ १६ गतेसमके लाग निषेधाज्ञा जारी करले रहे । पछिल्का समय कोरोना संक्रमणमे कुछ कमी आइलसँगे प्रशासन कुछ छुट डेले बा ।
अस्टेक कोभिड–१९ सम्बन्धी आदेशके प्रभावकारी पालना सम्बन्धमे सुरक्षा निकायसे नियमित तथा आकस्मिक अनुगमन करना फेन सूचनामे बटाइल बा
