३ हजार ढिउरजे संक्रमणमुक्त
पहुरा समाचारदाता
काठमाडौं, १६ भदौ । पाछेक २४ घण्टामे थप २०५२ जनहनमे कोरोना भाइरस संक्रमण पुष्टि हुइल बा ।
स्वास्थ्य तथा जनसंख्या मन्त्रालयके अनुसार १०,६१२ पीसीआर परीक्षणमे १,६४८ ओ ४,३२३ एन्टिजेन परीक्षणमे ४०४ जाने सहित २,०५२ जनहनमे संक्रमण पुष्टि हुइल हो ।
पाछेक २४ घण्टामे काठमाडौं उपत्यकामे ७१९ जनहनमे संक्रमण पुष्टि हुइल बा । जौन मध्ये काठमाडौंमे ४७१, भक्तपुरमे १४६ ओ ललितपुरमे १०२ जाने संक्रमित भेटल बाटै । मन्त्रालयके अनुसार पाछेक २४ घण्टामे कोरोना भाइरस संक्रमणमुक्त हुउइयाके संख्या ३,०३० रहल बा कलेसे २० जनहनके मृत्यु हुइल बा ।
अस्टेक, सेती प्रादेशिक अस्पतालमे उपचाररत २ जाने कोरोना संक्रमितके मृत्यु हुइल बा । पाछेक २४ घण्टामे मृत्यु हुउइयामे एक जाने बैतडी ओ एक जाने अछामके रहल बाटै । अस्पतालके सूचना अधिकारी दिलिप कुमार श्रेष्ठके अनुसार आईसियुमे उपचाररत बैतडीके दशरथचन्द नगरपालिका–८ के ३१ बर्षिय पुरुषके बुधके सकारे मृत्यु हुइल हो ।
ओस्टके आईसियुमे उपचाररत अछामके साफेबगर नगरपालिका–५ के ५१ बर्षीय पुरुषके मंगरके रातके मृत्यु हुइल रहे । हाल अस्पतालमे ११ जनहनके कोरोना संक्रमित उपचाररत रहल बाटै । उ मध्ये २ जनहनके आईसियु ओ २ जनहनके भेन्टिलेटरमे उपचार हुइल बा ।
ओस्टके सेतीमे २८ कोरोना संक्रमित थपल बाटै । पाछेक २४ घण्टामे १ सय ५८ नमूनाके कोरोना परिक्षण करलमे २८ संक्रमित थपल हुइट ।
