विपदके बेला ढेर लैङिक हिंसा

पहुरा समाचारदाता
धनगढी, १८ भदौ । महिला अधिकारकर्मीहुक्रे विपदके बेला ढेर लैङिक हिंसाके घटना हुइल बटैले बटै ।
ओरेक नेपालके आयोजनामे विफेक रोज धनगढीमे हुइल ‘अग्रपंक्तिमे रहिके काम कैना सेवा प्रदायहुकनके लाग आधारभूत मानवीय सिद्धान्त ओ सुरक्षित सम्पेषण सम्बन्धी एक दिने तालिममे सहभागी महिला अधिकारकर्मीहुक्रे उ बाट बटवाइल रहिट ।
बाढ, पहिरो, भुकम्प ओ कोभिडके बेला ढेर महिला तथा वालबालिका प्रभावित हुइल कहटी उ समयमे लैङिक हिंसाके घटनामे बृद्धि हुइल महिला अधिकारकर्मी निर्मला बागचन्द बटैली ।
सहायक प्रमुख जिल्ला अधिकारी हिरालाल चौधरी नेपाल विपदके दुष्टिसे ढेर जोखिममे रहल बटैलै । सुदूरपश्चिम प्रदेशमे बाढ, पहिरो, भुकम्पके ओटरे जोखिममे रहल ओरसे यी अवस्थामे हुई सेक्ना लैङिक हिंसाके घटनाप्रति सबसे सचेत हुई पर्ना बटैलै । तालिममे ओरेक नेपालके कार्यक्रम संयोजक लक्ष्मी आर्याल सहजीकरण रहल रहिट ।
तालिममे आधारभुत मानवीय सिद्धान्त ओ सुरक्षित सम्पेषण जानकारी डेहल रहे । एक दिने तालिममे ओरेक नेपालके जिल्ला कार्यक्रम संयोजक गीता चौधरी, अग्रपंक्तिमे रहिके काम कैना सेवा प्रदाय संघ संस्थाके प्रतिनिधिहुकनके सहभागिता रहल रहे ।
