कैलालीमे डल्फिन गणना सुरु
भजनी, १९ भदौ । कैलालीके दक्षिण पूर्व क्षेत्र टीकापुर नगरपालिका ओ भजनी नगरपालिकाके डल्फिन संरक्षण क्षेत्रमे शुकके रोजसे डल्फिन गणना सुरु करल बा ।
डल्फिन जलचर तथा जैविक विविधता संरक्षण नेपाल कैलाली पहिलचो डल्फिन गणना करे लागल हो । दुई दिनसम डल्फिन गणना करना डल्फिन जलचर तथा जैविक विविधता संरक्षण नेपालके अध्यक्ष भोजराज ढुंगाना जानकारी डेलैं ।
टीकापुर–भजनी डल्फिन संरक्षण सर्किट क्षेत्रके १३ स्थानमे डल्फिन गणना करल बा । जमरा कुलो पथरिया संगम, जनकपुर (बेलुवाघाट), सोनफाटा उत्तरपुर बाउन्नघाट, बैदी झरन पथरिया संगम, गैरी पथरिया संगम, काढानदी पथरिया संगम, पथरिया काढा मोहना त्रिवेणी, रेप्टीकुलो मोहना नदी संगम, कुशमघाट (मरियाघाट), कुसमघाट मोहना पथरिया संगम, तिलहाघाट खक्रौला पुरान भन्सार लग्गे, चौकुर्दी कर्णाली मोहना संगम, कर्णाली सत्तिपुल क्षेत्रमे डल्फिन गणना हुइ लागल अध्यक्ष ढुंगाना बटैलैं ।
पाँच वर्ष आघे एक चो डल्फिन गणना करल रहे । विसं २०७३ मे ६५ ठोके गणना करलमे २०७५ सालमे ५५ ठो डल्फिन देखा परल रहैं ।
अध्यक्ष ढुंगानाके अनुसार अनुमानित तथ्यांकअनुसार यी वर्ष ३५ से ४० ठो डल्फिन देखा परल बटैं । पछिल्का तथ्यांक हेरलेसे डल्फिनके संख्या बर्सेनि घटल ओरसे संरक्षण कना आवश्यक रहल संस्थाके महासचिव जयप्रसाद ढुंगानाके कहाइ बा ।
डल्फिन जलचर तथा जैविक विविधता संरक्षण नेपाल कैलाली ओत, कछुवा, गोही, पन्छी, लोपोन्मुख मच्छी, जैविक विविधता संरक्षण करना हुइल ओरसे संरक्षणके लाग एकीकृत रणनीति योजना तयार करना गइलओरसे फेन डल्फिन गणना आवश्यक हुइल उहाँ बटैलैं ।
बर्सातके चार महिना असार, साउन, भदौ ओ असोज महिना पथरिया, काढा, कान्द्रा नदी, गैरीनाला, रेप्टीनालामे गंगेटिक डल्फिन देखा परठै कलेसे अन्य समयमे कर्णाली नदीमे डेखैठैं ।
