प्रदेशके योजना तर्जुमा दिग्दर्शन सार्वजनिक
पहुरा समाचारदाता
धनगढी, १९ भदौ । सुदूरपश्चिम प्रदेशके योजना तर्जुमा दिग्दर्शन सार्वजनिक करल बा ।
प्रदेश सरकार गठन हुइल साढे तीन बरसपाछे योजना तर्जुना दिग्दर्शन तयार पारके प्रदेश नीति तथा योजना आयोगसे योजना तर्जुमा दिग्दर्शन सार्वजनिक करल हो । शुकके धनगढीमे आयोजित कार्यक्रममे योजना तर्जुमा दिग्दर्शन २०७८ सार्वजनिक करल हो ।
प्रदेश नीति तथा योजना आयोगके उपाध्यक्ष केशरबहादुर साउँदसे योजना तर्जुमा दिग्दर्शन सार्वजनिक हुइलसंगे आब योजना छनोट पारदर्शी हुइना विश्वास व्यक्त करलै । ‘विगतमा हचुवाके भरमे योजना छनोट हुइटी आइल रहे,’ साउद कहलै, ‘आब योजना तर्जुमा दिग्दर्शन तयार होसेकल बा । दिश्दर्शनमे कौना महिना का काम कैना कहिके स्पष्ट योजना बनैले बाटी । इहीहे प्रदेशके पाश्र्वचित्र कलेसे फेन फरक नैपरी ।’
उहाँ योजना तर्जुमा दिश्दर्शन तयार हुइलसंगे आब जनतासे अनुमोदित योजना किल कार्यान्वयनके चरणमे जैना विश्वास व्यक्त करलै ।‘योजना तर्जुमा दिग्दर्शन तयार हुइलपाछे आब हम्रे आवधिक योजना बनैना तयारीमे जुटल बाटी, आवधिक योजना पाँच बरसके हुइना बा,’ उहाँ कहलै ।
प्रदेश नीति तथा योजना आयोगके सचिव नारायण प्रसाद पौडेल योजना तर्जुमा दिग्दर्शन तयार हुइलसंगे प्रदेशके मन्त्रालयसे फेन आब उहे अनुसार योजना छनोट करे पर्ना बटैलै ।‘योजना आयोगसे योजना तर्जुमा करक लाग दिग्दर्शन बनाइल हो, कार्यान्वयन कैना जिम्मेवारी प्रदेश सरकारके हो,’ उहाँ कहलै । ०७७ पुसमे गठन हुइल नीति तथा योजना आयोगसे चैतमे किल अधिकार पाइलपाछे योजना तर्जुमा दिग्दर्शन बनैना सुरु करल रहे ।
विगतमे सुदूरपश्चिम प्रदेश सरकारसे योजना छनोटके लाग मापदण्ड बनाइ नैसेकके पहुँचके भरमे योजना छनोट हुइटी आइल रहे । मापदण्ड नैहुइल कारण प्रदेशके टमान मन्त्रालय ओ मातहतके निकायसे योजना किन्ना ओ कमिसनके भरमे उपभोक्ताहे बिक्री कैना परिपाटी रहे । मने योजना तर्जुमा दिग्दर्शन सार्वजनिक हुइलसंगे उक्त परिपाटी बन्द हुइना विश्वास करल बा ।
