मुक्त कमलरी कठैः हम्रेफे दक्ष बटी
पैसा पावर नइहोके अवसरे बन्चित हुइटी
प्रेम चौधरी
धनगढी, २० भदौ । ‘हम्रेफे टाइलेन्ट बाटी, हमारफे क्षमता बा, हमारठेन पैसा पावर नइहो टबमारे सरकारी जागिरसे बन्चित हुइटी । मने हम्रहिनसेफे कमजोर मनै पैसा, पावरके भर जागिर खाइटै, यी आवाज हो मुक्त कमलरीहुकनके ।
मुक्त कमलरीहुकनके हकहित ओ विगतके दिनमे नेपाल सरकार ओ कमलरी प्रथा उन्मुलनके लाग संयुक्त संघर्ष समिति विच हुइल सम्झौताहे ध्यानाकर्षणके ज्ञापनपत्र बुझाई पुगल मुक्तकमलरी मुख्यमन्त्री त्रिलोचन भट्ट ओ भूमि तथा कृषि सहकारी मन्त्री विनिता चौधरीके ठेन उठाइल आवाज हो ।
मुक्त कमलरी विकास मञ्चके जिल्ला सदस्य रजनी चौधरी कहठी–टेक्निकल लाइन पास करल, स्तानक तह पास करल ढेर मुक्तकमलरी खाली घरेक बैठे परल बा, प्रदेश, स्थानीय तहके तरेक तह वडाफे आवश्यकता खुलठ मने, उहाँ पैसा ओ पावर हुइल व्यक्ति केल छनौट हुइठै ।
‘हम्रेफे टाइलेन्ट बाटी, हमारफे क्षमता बा, हमारठेन पैसा पावर नइहो टबमारे सरकारी जागिरसे बन्चित हुइटी । मने हम्रहिनसेफे कमजोर मनै पैसा, पावरके भर जागिर खाइटै ।, हम्रहिनफे ढेर पह्रके सरकारी जागिर खैना मन बा, अपन गोरामे ठरहयाइना मन बा, और भरमे कटरा बच्ना, टेक्निकल लाइन पह्रल लिखल मुक्तकमलरी सरकारी जागिरसे बन्चित बटै, जेकर ठेन पैसा पावर बा, ओइने केल जागिर पैटी बटै, मुक्तकमलरी दक्ष रहलेसेफे अवसरसे बन्चित हुइल बटै ।
नेपाल सरकार निशुल्क शिक्षा कहलेसेफे अपनेहुक्रे ओकर आभास करे नइपाइल बटैली । उहाँ कहली, छात्रवृतिके लाग कहटी कक्षा १० मे १८ सय डेहठ मने, उहीसे ढेर ४ हजारसे लागठ, छात्रवृतिके पैसासे न फिस डेहे पुगठ, न कितावकापी लेहे पुगठ, डे«स कैसिक किन्ना, कैसिक पह्रना हो टे ।
मुक्तकमलरी विकास मञ्च कैलालीके जिल्ला अध्यक्ष विन्द्रा चौधरी कैलाली जिल्लामे मुक्तकमलरीके संख्या ४ हजार ७४ जाने रहल बटैटी १३ सय ७४ जाने परिचयपत्रसे छुट हुइल बटैली । उहाँ कहली, परिचयपत्र नइहुइलक कारण सरकारसे पैना सेवा सुविधासे बन्चित हुई परल अवस्था बा । समयमे छात्रवृति नइपुगल, आर्थिक आभावमे विद्यालय छोरना, बाल विवाह कैना, सीपमुलक तालिमसेफे बन्चित हुई परल अध्यक्ष बटैली ।
मुक्त कमलरी विकास मञ्च कञ्चनपुरके अध्यक्ष सिता चौधरी छात्रवासमे बैठके अध्ययन करटी रहल मुक्त कमलरीहुक्रे स्वास्थ्य, आवश्यक शिक्षा, पोषणयुक्त खानासे बन्चित हुइल बटैली ।
उहाँ कहली, मुक्तकमलरी बाबुहुक्रे अँग्रेजी माध्यममे पह्रना चाहल मने सरकारसे ओकर व्यवस्था नइकरल बटैली । छात्रवासमे रहल मुक्तकमलरी विमार हुई बेला ओइनके घर पठाडेना मने अभिभावक विहिन रहुइयाहे स्वास्थ्य उपचार कैना समस्या आइल उहाँ कहली । अभिभावक विहिन मुक्तकमलरी कक्षा १२ के परिक्षा डेहे मामा घर बैठना बाध्य रहलफे उहाँ कहली ।
कैलालीके सेहरीमे रहल सरस्वती माविके छात्रवासके बैठक पह्रटी रहल कक्षा १२ के सरु चौधरी नेपाल सरकारसे बैठना ओ खैनाके व्यवस्था केल करल मने अपनेहुकन शैक्षिक सामाग्रीके अभाव हुइल उहाँ बटैली ।
खाना बैठना ओटरा मजा नइहो उहाँ कहली–लोक सेवा लरेक लाग कोचिङ, कम्प्यूटर शिक्षाके व्यवस्था करे पर्ना उहाँ माग करले रहि । अभिभावक विहिन मुक्तकमलरी १२ कक्षा परिक्षापाछे अलपटरा परल बटैली । एसइइ पाछे प्राविधिक शिक्षाके बहुट इच्छा रहलेसेफे सरकारसे ओकर व्यवस्था नइकरल उहाँ बटैली ।
कञ्चनपुर जिल्लाके पूर्ण माविमे अध्ययनरत रहल मुक्तकमलरी करुणा चौधरी छात्रवासमे पानी, स्वास्थ्यके समस्या रहल बटैली । छात्रवृति स्वरुप मासिक पाँच सय रुप्यासे कुछ नइपुग्ना उहाँ बटैली । एक्के कोठामे तीन चार जाने बैठे पर्ना बाध्य रहल बटैली ।
भूमि तथा कृषि सहकारी मन्त्री विनिता चौधरी मुक्त कमैया हलिया, मुक्त कमलरी संघीय सरकार हेरटी रहल बटैली, मने ओइनके लाग कैना काम करटी रहल बटैली । कार्यविधिमे विउ पूँजीके लाग बर्षेणी सहयोग करटी बाटी, तमान सहकारीके भवनफे बनाडेले बटी ।
कमलरीके जुनेली सहकारी मुक्तकमलरीके नाउँमे खोलल मने और जानेक हाली मुहाली रहल बटैली । मुक्तकमलरी, मुक्तकमैया संयूक्त रुपमे जैना जरुरी रहल हम्रे रोजगारीमे जोरे चाहल मने कतिपय ठाउँमे ओइने चासो नइडेहल मन्त्री चौधरी बटैली । घर बैठल मुक्तकमलरीहुकनहे आयआर्जनमे जोरे खोजलफे उहाँ बटैली ।
मुख्यमन्त्री त्रिलोचन भट्ट स्थानीय तहसे संचालन करल विद्यालयके समस्या पहल करे पैना मने दवाव डेहे नइसेक्ना बटैलै । छात्रवासमे मुक्तकमलरीके १२ महिना बैठे पर्ना व्यवस्थाके लाग छलफल कैना उहाँ बटैलै ।
मुक्त कमलरीहुकन ओइनके इच्छा अनुसार प्राविधिक तालिमके व्यवस्था कैना, प्रदेश लोक सेवाके लाग तीन महिना कोर्षके व्यवस्था कैना, शिक्षा निर्देशिका संघीय सरकारसे करे पर्ना ओरसे पहल कैना, सहकारी मुक्त कमलरीहुकनके संलग्नामे रहलहे भवन बनैना, तालिमके व्यवस्था कैना, विद्यालयमे समस्या आइल बा, ओइनके बारेमे बुझना बटैलै । छुट मुक्तकमलरीके बारेमे ताकेटा करटी रहल बटैलै ।
सम्बन्धित समाचार
मुख्यमन्त्री ओ भूमि तथा कृषि सहकारी मन्त्रीहे २२ बुँदे माग सहिट ज्ञापनपत्र
