सुदूरपश्चिम प्रदेशसभामे नेकपा एकीकृत समाजवादी बल्गर
पहुरा समाचारदाता
धनगढी, २० भदौ । सुदूरपश्चिम प्रदेशमे एकीकृत समाजवादीमे खुलुइयाके संख्या १३ पुगल बा ।
अँटवारके रोज सुदूरपश्चिम प्रदेशके थप ३ सांसदहुक्रे निर्वाचन आयोग पुगके सनाखत करलपाछे नेकपा एकीकृत समाजवादीमे १३ प्रदेशसभा सदस्य पुगल हो । प्रदेश निर्वाचन आयोग कार्यालयमे पुगके भौतिक पूर्वाधारमन्त्री दीर्घ सोडारी, उद्योग पर्यटन, वन तथा वातावरण पूर्व राज्यमन्त्री प्रकाश रावल ओ तारालामा तामाङ सनाखत करल हुइट ।
यी आघे माधवकुमार नेपाल नेतृत्वके एकीकृत समाजवादीमे प्रदेशके आन्तरिक मामिला तथा कानुन मन्त्री समेत रहल पूर्णा जोशी, सामाजिक विकास मन्त्री लालबहादुर खड्का, पूर्वमन्त्री माया भट्ट, राज्यमन्त्री चुनकुमारी चौधरी, मनाकुमारी साउँद, प्रमुख सचेतक दुर्गाकुमारी कामी, अस्टेक, प्रदेशसभा सदस्य कुलवीर चौधरी, अमरबहादुर साउँद, बलबहदुर सोडारी ओ सुशीला बुढाथोकी फेन नयाँ खोलल दल नेकपा एकीकृत समाजावदीके पक्षमे सनाखत करले रहिट ।
२४ जाने सांसद रहल नेकपा एमालेसे १३ जाने एकीकृत समाजवादीमे आइलपाछे सुदूरपश्चिम प्रदेशसभामे माधवकुमार नेपाल नेतृत्वके एकीकृत समाजवादी बल्गर हुइल बा ।
गैल भदौ ९ गते निर्वाचन आयोगसे एकीकृत समाजवादी ओ लोकतान्त्रिक समाजवादीहे मान्यता डेहलसंगे प्रदेश तथा स्थानीय जनप्रतिनिधिहुकनहे दल रोजेक लाग निर्वाचन आयोगसे भदौ २२ गतेसमके मिति तय करल रहे ।
